బిగ్ బాస్ తెలుగు 6 విజయవంతంగా సాగుతోంది. 12వ రోజులో భాగంగా బిగ్ బాస్ హౌస్‌లో సందడి చేశారు సుధీర్ బాబు, కృతి శెట్టి. హౌస్ లోని కంటెస్టెంట్స్ కి పలు సినిమాల్లోని సీన్లు ఇచ్చి యాక్ట్ చేసి చూపించమన్నారు. ఈ టాస్క్ లో భాగంగా రేవంత్‌ ఎవడు కొడితే దిమ్మ తిరిగి మైండ్‌ బ్లాక్‌ అవుతుందో అంటూ పోకిరి సీన్లు చేశాడు.
గీతూ రాయల్‌ బుజ్జిగాడు సినిమాలో ప్రభాస్‌లా చేసింది. శ్రీహాన్‌, ఫైమా కలిసి `పోకిరి`లోని లిఫ్ట్ ఎపిసోడ్ చేసి నవ్వించారు. రాజశేఖర్, శ్రీ సత్య కలిసి `ప్రేమ కథా చిత్రమ్‌` సీన్లు చేశారు. శానీ, చంటి, ఆర్‌ జే సూర్య, అభినయశ్రీ కలిసి వెంకీ సినిమాలోని సీన్లు చేసి కామెడీ పంచారు. టాస్క్‌లో ఉత్తమ నటీనటులను ఎంపిక చేయమని బిగ్‌‌బాస్‌ చెప్పడంతో ఉత్తమ నటుడిగా శ్రీహాన్‌ని, ఉత్తమ నటిగా శ్రీసత్యని ఎంపిక చేశారు. అలా ఎపిసోడ్ ఆద్యంతం సరదాగా సాగిపోయింది.
ఇక అంతకముందు ఈ వారం కెప్టెన్‌ని ఎన్నుకున్నారు కంటెస్టెంట్స్. కెప్టెన్సీ కంటెండర్స్ గా చివరి వరకు చంటి, ఆర్జే సూర్య, రాజశేఖర్, ఇనయలు నిలవగా దీంతో వారికి డీజేలుగా వ్యవహరించాలని ఓ టాస్క్ ఇచ్చారు. వాళ్ళు పాటలు ప్లే చేస్తుంటే కంటెస్టెంట్స్ డ్యాన్స్ చేయాలి. వారిలో ఎవరు బాగా ప్లే చేస్తే వారికి ఇద్దరిద్దరు కలిపి ఓట్లు వేయాలని చెప్పారు బిగ్‌‌బాస్‌. ఈ టాస్క్ లో రాజశేఖర్‌కి నాలుగు ఓట్లు వచ్చాయి. మూడు ఓట్లు ఆర్జే సూర్యకి, రెండు చంటికి, ఒకటి ఇనయకి రావడంతో రాజశేఖర్ ఎవరూ ఊహించని విధంగా కెప్టెన్ అయ్యారు.
