సంచలనం సృష్టించిన డ్రగ్స్ కేసులో పోలీసులు దర్యాప్తు ముమ్మరం చేశారు. వివిధ కోణాల్లో విచారణ జరుపుతున్న పోలీసులు..పబ్‌లో లభించిన శాంపిల్స్ సేకరించి ఫోరెన్సిక్ సైన్స్ ల్యాబ్‌కు పంపారు. ప్రాథమిక నిర్దారణ ఆధారంగా అది కొకైన్ అని తేలగా పార్టీలో పాల్గొన్నవారి నుండి వివరాలను సేకరించారు. ఇక ఈ కేసులో ఇప్పటికే అనిల్,అభిషేక్‌ ఇద్దరిని అరెస్ట్ చేయగా పార్టీ నిర్వాహకుడు అర్జున్ వీరమాచినేని పరారీలో ఉన్నారు. ఇక ఈ ఈవెంట్ మేనేజర్‌ కునాల్, డీజే శశిధర్‌రావుల పాత్రపై కూడా పోలీసులు ఆరా తీస్తున్నారు.
ఈ పబ్ లోకి రావడం అంత ఈజీ కాదని మెంబర్ షిప్ వున్నవారికే అవకాశం వుందన్నారు డీసీపీ జోయల్ డేవిస్. పబ్ లో ఎవరైనా అడుగుపెట్టాలంటే ఓ యాప్ సాయంతో ఓటీపీ ఎంటర్ చేస్తేనే అనుమతి లభిస్తుందని వివరించారు.
పబ్ 24 గంటలు తెరిచి ఉంటుందని ప్రచారం చేసి కస్టమర్లను ఆహ్వానించారని, అది నమ్మి అనేకమంది కస్టమర్లు పబ్ కు వచ్చి ఉంటారన్నారు. పబ్ కు వచ్చిన వారి పేర్లు బయటపెట్టడం సరికాదని…. వారిలో ఎవరైనా డ్రగ్స్ తీసుకున్నట్టు తేలితే వారి పేర్లు తామే మీడియాకు తెలియచేస్తామని డీసీపీ స్పష్టం చేశారు.
