వెండిత‌ర‌పై తన అందం, అభిన‌యంతో కోట్లాది మంది మ‌న‌సుల‌లో చెర‌గ‌ని ముద్ర వేసుకున్నమహానటి శ్రీదేవి. తెలుగు, తమిళ, హిందీతో పాటు పలు భాషా చిత్రాల్లో నటించి సూపర్‌స్టార్‌ హీరోయిన్‌గా స్థానం సంపాధించుకుంది ఈ అతిలోక సుందరి. అలాంటి శ్రీదేవి గత ఏడాది ఫిబ్రవరి 24వ తేదీన దుబాయ్ లోని ఒక హోటల్లో హఠాత్తుగా చనిపోయారు. ఆమె మరణ వార్తను ఇప్పటికీ మర్చిపోలేక బాధపడుతున్న వారు ఎంతోమంది వున్నారు. ఆమె భౌతికంగా ఈ లోకాన్ని వీడినా న‌టిగా మాత్రం చిత్ర పరిశ్రమలో బ్రతికే ఉంది.
అయితే మరి కొద్ది రోజుల‌లో శ్రీదేవి మ‌ర‌ణించి ఏడాది కావొస్తుండ‌డంగా కుటుంబ సభ్యులు ఆమె ప్రథమ వర్ధంతిని జరపడానికి ఏర్పాట్లు చేస్తున్నారు. ఇక అసలు విషయానికొస్తే.. శ్రీదేవికి నచ్చిన స్థ‌లంలోనే ఈ కార్యక్రమాన్ని జరపాలని నిర్ణ‌యించుకున్నార‌ట. మరి ఈ అతిలోక సుందిరికి నచ్చిన ప్రదేశం ఏంటనేగా మీ సందేహం.. శ్రీదేవికి చెన్నై నగరం అంటే ఇష్టమట..అంతేకాదు అక్కడ ఉన్న తన ఇల్లు అన్నా ఎంతో ఇష్టమట.
అందువలన అక్కడే ఆమె ప్రథమ వర్ధంతిని జరపాలని శ్రీదేవి కుటుంబ సభ్యులు నిర్ణయించుకున్నారని సమాచారం. ఆ రోజు నిర్వహించే ప్రత్యేక పూజలో శ్రీదేవి కుటుంబ సభ్యులతో పాటు, పలువురు సినీ ప్రముఖులు కూడా పాల్గొన‌నున్నార‌ని చెబుతున్నారు.
