నందమూరి బాలకృష్ణ-క్రిష్ కాంబినేషన్‌లో భారీ అంచనాల మధ్య తెరకెక్కుతున్న చిత్రం ఎన్టీఆర్. దివంగత నందమూరి తారక రామారావు సినీ,రాజకీయ జీవితం నేపథ్యంలో తెరకెక్కుతుండగా సంక్రాంతికి ప్రేక్షకుల ముందుకురానుంది. ఇప్పటివరకు సినిమాకు సంబంధించి ఆసక్తికర అప్‌డేట్స్ ఇస్తూ వచ్చిన క్రిష్ తాజాగా సాంగ్స్‌ని వినిపించేందుకు సిద్ధమవుతున్నారు.
రేపు ఉదయం 7.42గంటలకు కథనాయకుడు ఫస్ట్ సాంగ్‌ను రిలీజ్ చేయనున్నట్లు పోస్టర్‌ని విడుదల చేశారు. ఎన్టీఆర్ బయోపిక్‌ రెండు పార్టులుగా తెరకెక్కుతుండగా సినీ జీవితం నేపథ్యంలో కథానాయకుడు,రాజకీయ జీవితం నేపథ్యంలో మహానాయకుడు తెరకెక్కుతోంది. అయితే పోస్టర్‌లో మహానాయకుడుగా ఎన్టీఆర్ పిక్‌ని రిలీజ్ చేసి కథానాయకుడు సాంగ్‌ విడుదల చేయనున్నట్లు ప్రకటించి గందరగోళంలో పడేశారు క్రిష్.
ఇప్పటికే సినిమాలో నటించే పలువురి ఆర్టిస్టుల స్టిల్స్‌-వారు పోషించే పాత్రల వివరాలను వెల్లడించిన క్రిష్ మరో అప్ డేట్ ఇచ్చేశాడు. ‘కథానాయకుడు’లో హాస్య నటుడు వెన్నెల కిషోర్ ఓ కీలక పాత్ర చేయనున్నారు. ఎన్టీఆర్ బావమరిది, మేనేజరు అయిన రుక్మానాధరావు పాత్రలో వెన్నెల కిషోర్ కనిపించనున్నారు. కథానాయకుడు జనవరి 9న,మహానాయకుడు జనవరి 24న విడుదల కానుంది.
