సూపర్ స్టార్ రజినీకాంత్ ఇద్దరు కూతుళ్ళు కూడా దర్శకత్వ శాఖలో రాణించాలనుకున్నారు. అయితే వారు చేసిన సినిమాలు చేదు అనుభవాన్ని మిగిల్చాయి. ఐశ్వర్యా తన భర్త ధనుష్‌తో చేసిన ‘3’ సినిమా డిజాస్టర్‌గా నిలిచింది.
సౌందర్య రజినీకాంత్ తన తండ్రి రజినీకాంత్‌ను హీరోగా పెట్టి ‘కొచ్చాడయాన్’ అనే యానిమేషన్ సినిమా చేసింది. ఆ సినిమా రజిని అభిమానులకు నిరాశను మిగిల్చింది. అయితే ఇప్పుడు ఆ సినిమాను మళ్ళీ తీస్తానంటోంది దర్శకురాలు సౌందర్య.
తన తండ్రిని యానిమేటెడ్ రూపంలో చూపించడం అభిమానులకు బాధ కలిగించిందని, తనకు కూడా నిజమైన రజినీకాంత్‌ను తెరపై చూపించాలనుందని ఆమె వెల్లడించింది. ‘బాహుబలి’ తరహాలో కొచ్చాడయాన్ సినిమాను భారీ స్థాయిలో తెరకెక్కించాలని ఆశగా ఉందని ఆమె చెప్పుకొచ్చింది.
అయితే ‘కొచ్చాడయాన్’ సినిమాను ఆమె మళ్ళీ తీయడం పట్ల అభిమానులు ఆసక్తి చూపడం లేదు. ఆమె ఆ ప్రయత్నం మానుకుంటేనే మంచిదనే అభిప్రాయాలు వ్యక్తమవుతున్నాయి. ప్రస్తుతం సౌందర్య డైరెక్ట్ చేసిన ‘విఐపి2’ సినిమా విడుదలకు సిద్ధమవుతోంది.
