రాముడికి ఒక అవకాశం ఇవ్వండి!

పశ్చిమ బెంగాల్ శాసనసభ ఎన్నికల వేడి తారాస్థాయికి చేరింది. ప్రచారంలో భాగంగా ప్రతిపక్ష నాయకుడు, బీజేపీ నేత సువేందు అధికారి… తృణమూల్ కాంగ్రెస్ (TMC)పై విరుచుకుపడ్డారు. రాష్ట్రంలో దశాబ్దాలుగా సాగుతున్న అరాచక పాలనకు స్వస్తి పలకాలని, ఈసారి “రాముడికి (బీజేపీకి) ఒక అవకాశం ఇవ్వండి” అని ఆయన ప్రజలకు పిలుపునిచ్చారు.

రాష్ట్ర అభివృద్ధిని గత ప్రభుత్వాలు అడ్డుకున్నాయని సువేందు ఆరోపించారు. గత 15 ఏళ్లుగా బెంగాల్‌ను దొంగలు (టీఎంసీని ఉద్దేశించి) పాలిస్తున్నారని, ప్రజల సొమ్మును దోచుకుంటున్నారని ఆయన విమర్శించారు. అంతకుముందు 35 ఏళ్ల పాటు సాగిన వామపక్షాల పాలనలో బెంగాల్ వెనుకబడిపోయిందని, మొత్తం 50 ఏళ్ల కాలాన్ని ప్రజలు వృధా చేసుకున్నారని ఆవేదన వ్యక్తం చేశారు.

రాష్ట్రంలో శాంతిభద్రతలు క్షీణించాయి, అవినీతి పెచ్చుమీరింది. ఈ పరిస్థితుల నుంచి బెంగాల్ బయటపడాలంటే అది కేవలం బీజేపీ వల్లే సాధ్యం. అందుకే ఈసారి ‘రాముడి’కి (బీజేపీకి) అవకాశం ఇవ్వండి. రాష్ట్రంలో మళ్ళీ రామరాజ్యం మరియు అభివృద్ధి వస్తుంది” అని సువేందు పేర్కొన్నారు.

పశ్చిమ బెంగాల్‌లో త్వరలో జరగనున్న ఎన్నికల్లో అధికారాన్ని చేజిక్కించుకోవాలని బీజేపీ సర్వశక్తులూ ఒడ్డుతోంది. మరోవైపు మమతా బెనర్జీ నేతృత్వంలోని టీఎంసీ తన పట్టును నిలుపుకోవాలని ప్రయత్నిస్తోంది.

Also Read:తమిళనాడు సీఎంకు రేవంత్ రెడ్డి లేఖ