తమిళనాడు సీఎంకు రేవంత్ రెడ్డి లేఖ

లోక్‌సభ నియోజకవర్గాల పునర్విభజన (Delimitation) అంశంపై తెలంగాణ ముఖ్యమంత్రి రేవంత్ రెడ్డి, తమిళనాడు ముఖ్యమంత్రి ఎంకే స్టాలిన్‌కు లేఖ రాశారు. జనాభా ప్రాతిపదికన ఈ పునర్విభజన ప్రక్రియ చేపడితే దక్షిణాది రాష్ట్రాలు రాజకీయంగా తీవ్రంగా నష్టపోతాయని రేవంత్ రెడ్డి ఈ లేఖలో తన ఆందోళన వ్యక్తం చేశారు.

నియోజకవర్గాల సర్దుబాటును కేవలం జనాభా ఆధారంగా చేయడం వల్ల అభివృద్ధి పథంలో దూసుకుపోతున్న దక్షిణాది రాష్ట్రాల రాజకీయ హక్కులపై జరుగుతున్న దాడిగా రేవంత్ అభివర్ణించారు. కుటుంబ నియంత్రణ మరియు అభివృద్ధిని సమర్థవంతంగా అమలు చేసిన రాష్ట్రాలను శిక్షించినట్లు అవుతుందని ఆయన పేర్కొన్నారు.

ఈ ముప్పును తమిళనాడు ముఖ్యమంత్రి ఎంకే స్టాలిన్ అందరికంటే ముందుగానే గుర్తించారని రేవంత్ రెడ్డి ప్రశంసించారు. గత ఏడాది మార్చిలో చెన్నైలో దక్షిణాది రాష్ట్రాల నేతలతో సమావేశం నిర్వహించి, ఈ అంశంపై చర్చను ప్రారంభించడాన్ని ఆయన గుర్తు చేశారు. ఈ పోరాటంలో అందరూ కలిసి రావాల్సిన అవసరం ఉందని రేవంత్ పిలుపునిచ్చారు.

రేవంత్ రెడ్డి లేఖపై తమిళనాడు సీఎం సానుకూలంగా స్పందించారు. దక్షిణాది రాష్ట్రాలన్నీ ఈ విషయంలో ఒకే తాటిపై నిలబడతాయని స్టాలిన్ స్పష్టం చేశారు. తెలంగాణ ప్రభుత్వం చేస్తున్న ఈ ప్రయత్నానికి తమ పూర్తి మద్దతు ఉంటుందని, రాష్ట్రాల ప్రయోజనాల కోసం రాజీలేని పోరాటం చేస్తామని ఆయన హామీ ఇచ్చారు.

Also Read:ఎంతసేపు స్క్రీన్ చూస్తే ప్రమాదమో తెలుసా?