మెగాస్టార్ చిరంజీవి ‘ఖైదీ నంబర్ 150’ సినిమాతో గ్రాండ్ రీ ఎంట్రీ ఇచ్చారు. అంతేకాదు రూ. 100 కోట్లకు పైగా కలెక్షన్లతో సత్తా చాటి తనలో ఉన్న జోరు ఇంకా తగ్గలేదని నిరూపించారు చిరు. ఈ సినిమా ఇచ్చిన జోష్‌తో చిరు ఇప్పుడు వ‌రుస‌గా త‌న సినిమాల‌ను ప‌ట్టాలెక్కిస్తున్నాడు. ఇప్పటికే 151వ సినిమా సురేంద‌ర్ రెడ్డి డైరెక్ష‌న్‌లో తెర‌కెక్క‌నుంది. ఉయ్యాలవాడ న‌ర‌సింహారెడ్డి జీవిత‌చ‌రిత్ర‌గా ఈ సినిమా తెర‌కెక్కనుండగా ఇప్పటికే ఈ సినిమాకు సంబంధించిన ప్రీ ప్రొడక్షన్ పనులు శరవేగంగా కొనసాగుతున్నాయి.
అయితే మెగాస్టార్ చిరంజీవి 151వ సినిమాగా ‘ఉయ్యాలవాడ నరసింహా రెడ్డి’ని అత్యంత భారీ బడ్జెట్ తో నిర్మించేందుకు రామ్‌చరణ్ తేజ్‌ రెడీ అయిపోయాడు. ప్రస్తుతం ఈ సినిమాను సెట్స్ పైకి తీసుకెళ్లే దిశగా సన్నాహాలు జరుగుతున్నాయి. ఇక ఈ సినిమా కోసం భారీ బడ్జెట్ ను కేటాయించడమే కాకుండా నటీనటుల విషయంలో కూడా తగిన జాగ్రత్తలు తీసుకుంటున్నాడు చరణ్. అందులో భాగంగానే ‘బాహుబలి’ సిరీస్ తో దేశవ్యాప్తంగా గుర్తింపు తెచ్చుకున్న నటుడు, చిన్ననాటి స్నేహితుడు అయిన రానా దగ్గుబాటిని ఈ ప్రాజెక్టులో నటింపజేయాలని ప్లాన్ చేస్తున్నాడట.
ఈ పాత్రను రానా చేస్తేనే బాగుంటుందని భావించిన చరణ్, రానాని సంప్రదించడానికి రెడీ అవుతున్నాడని అంటున్నారు. ఇప్పటివరకూ ‘బాహుబలి 2’ సినిమా ప్రమోషన్స్ లో రానా బిజీగా ఉండటం వలన, చరణ్ రానా దగ్గర ఈ విషయాన్ని గురించి ప్రస్తావించలేదట. ఈ సినిమా కోసం రానాను తీసుకుంటే తప్పకుండా రానా ప్రత్యేక ఆకర్షణ అవుతాడనీ, చరణ్ అడిగితే రానా కాదనడమంటూ జరగదనే అభిప్రాయాలు వ్యక్తమవుతున్నాయి.
