అంజనేయ స్వామి అనుగ్రహంతోనే జనసేన పార్టీని స్ధాపించానని పవర్ స్టార్ పవన్ కల్యాణ్ అన్నారు. హైదరాబాద్ జనసేన పార్టీ కార్యాలయం నుంచి కొండగట్టుకు చేరుకున్న పవన్..ఆంజనేయ స్వామిని దర్శించుకున్నారు. ఈ సందర్భంగా ఆలయ అధికారులు పూర్ణకుంభంతో స్వాగతం పలకగా పవన్ ప్రత్యేక పూజలు నిర్వహించారు.
ఆలయ అభివృద్ధికి రూ.11 లక్షల విరాళాన్ని అందజేశారు. అనంతరం మాట్లాడిన పవన్ స్వామి ఆశీస్సులతో 2009లో బతికానని తెలిపారు. కొండగట్టు ఆలయ అభివృద్దికి శాయశక్తుల కృషిచేస్తానని తెలిపారు. స్వామినన్ను చల్లగా చూడాలని మనసారా మొక్కుకున్నాని తెలిపారు.
అంతకముందు ప్రజాయాత్రను పురస్కరించుకొని సోషల్ మీడియాకు సంబంధించిన జనసేన పార్టీ ప్రత్యేక మహిళా విభాగాన్ని లాంఛనంగా ప్రారంభించారు పవన్. ‘వీరమహిళ’ పేరుతో సోషల్ మీడియా బృందాన్ని ఏర్పాటు చేసినట్లు తెలిపిన పవన్… క్రియాశీలక సభ్యులుగా పనిచేయడానికి ముందుకు వచ్చిన మహిళలకు అభినందనలు తెలిపారు. జనసేన సిద్ధాంతాలను ప్రజల్లోకి తీసుకెళ్తూ ప్రజా సమస్యలను పార్టీ దృష్టికి తీసుకువచ్చే విధంగా కృషిచేస్తారనే నమ్మకాన్ని ఈ సందర్భంగా పవన్ వ్యక్తం చేశారు.
