తెలుగు తెరపై కన్నడ ముద్దుగుమ్మ నభా నటేశ్ తన నటనతో, గ్లామర్‌తో కుర్రకారు మనసులను దోచుకుంటుంది.. తొలి సినిమా ‘నన్ను దోచుకుందువటే’తోనే విజయం అందుకుంది ఈ బ్యూటీ. ఇక రెండవ సినిమాతోనే డైరెక్టర్‌ పూరి ప్రాజెక్టులో ఛాన్స్ కొట్టేసింది. ఆయన దర్శకత్వం వహించిన ‘ఇస్మార్ట్ శంకర్’లో హీరో రామ్‌కు జోడీగా తెలంగాణ స్లాంగ్‌లో మాస్ క్యారెక్టర్‌తో అదరగొట్టింది. దీంతో టాలీవుడ్‌లో క్రేజీ హీరోయిన్‌గా మారిపోయింది.
ప్రస్తుతం మాస్ మహారాజా రవితేజ సరసన `డిస్కో రాజా` చిత్రంతో వేడెక్కించే పాత్రలో నటిస్తున్న ఈ బ్యూటీని భారీ ఆఫర్‌లు తన ఇంటి తలుపు తడుతున్నాయట. ఇటీవలే అక్కినేని అఖిల్ సరసన చాన్స్ దక్కనుందని ప్రచారమైంది. ఆ ఆఫర్ సంగతేమో కానీ.. తాజాగా సుప్రీం హీరో సాయిధరమ్ సరసన నభా ఓ క్రేజీ చిత్రానికి సంతకం చేసింది. ఈ సినిమాకి టైటిల్ ఇంకా నిర్ణయించాల్సి ఉంది. ఇదే చిత్రంతోనే సుబ్బు దర్శకుడిగా పరిచయం అవుతున్నారు. అక్టోబర్ లో సినిమా ప్రారంభం కానుంది. మెగా నిర్మాత బీవీఎస్.ఎన్ ప్రసాద్ ఈ చిత్రాన్ని నిర్మిస్తున్నారు.
