ఎప్పుడెప్పుడా అని ఎదురుచూస్తున్న నైరుతి రుతుపవనాలు ఎట్టకేలకు మంగళవారం మహారాష్ట్రలోని ముంబై నగరంలోకి ప్రవేశించాయి. నగరంతో పాటు దాని పరిసర ప్రాంతాలలో సోమవారం నుండి ముందస్తు రుతుపవన (ప్రీ-మాన్సూన్) జల్లుల రూపంలో భారీ వర్షాలు ప్రారంభం కావడంతో ఐఎండీ (భారత వాతావరణ శాఖ) హెచ్చరికలు జారీ చేసింది.
మహారాష్ట్రలో నైరుతి రుతుపవనాల తాజా పునరుజ్జీవనం కారణంగా రాబోయే 48 గంటల్లో అవి ముంబైని తాకుతాయని ఐఎండీ సోమవారం తెలిపింది. అయితే, అప్పటివరకు భారతదేశ ఆర్థిక రాజధానిలో కురిసిన వర్షాలు వాస్తవానికి ముందస్తు రుతుపవన జల్లులేనని వాతావరణ శాఖ స్పష్టం చేసింది.
మంగళవారం జారీ చేసిన తాజా ప్రకటనలో ఐఎండీ… నైరుతి రుతుపవనాలు మధ్య అరేబియా సముద్రంలోని మిగిలిన ప్రాంతాలు, ముంబైతో సహా మహారాష్ట్రలోని మరికొన్ని ప్రాంతాలు, తెలంగాణ, ఒడిశాలలోని మిగిలిన ప్రాంతాలు, ఛత్తీస్గఢ్, జార్ఖండ్ అలాగే బీహార్లోని మరికొన్ని ప్రాంతాల్లోకి మరింత ముందుకు విస్తరించాయని పేర్కొంది.
నైరుతి రుతుపవనాలు దూసుకురావడంతో ముంబై మరియు మహారాష్ట్రలోని పలు సమీప జిల్లాలకు మంగళవారం ఐఎండీ భారీ వర్షాల కోసం ‘ఆరెంజ్ అలర్ట్’ జారీ చేసింది. ఐఎండీ వెబ్సైట్లో అందుబాటులో ఉన్న సమాచారం ప్రకారం మంగళవారం ముంబై ఆరెంజ్ అలర్ట్ పరిధిలో ఉంది. ఈ అలర్ట్ కనీసం మధ్యాహ్నం 1 గంటల వరకు సాధారణం నుండి భారీ వర్షాలు కురిసే అవకాశం ఉందని హెచ్చరించింది.
ముంబైలో వర్షాకాలం ప్రారంభమైనట్లు ప్రకటిస్తూ, రాబోయే రెండు మూడు రోజుల్లో ఉత్తర అరేబియా సముద్రం, గుజరాత్లోని కొన్ని ప్రాంతాలు, మహారాష్ట్ర, ఛత్తీస్గఢ్లోని మరికొన్ని ప్రాంతాలు, మధ్యప్రదేశ్లోని కొన్ని ప్రాంతాల్లోకి నైరుతి రుతుపవనాలు మరింత ముందుకు సాగడానికి పరిస్థితులు అనుకూలంగా ఉన్నాయని ఐఎండీ మంగళవారం తెలిపింది. ఆ తర్వాతి మూడు నాలుగు రోజుల్లో జార్ఖండ్, బీహార్లోని మిగిలిన ప్రాంతాలు, ఉత్తరప్రదేశ్లోని కొన్ని ప్రాంతాలకు కూడా రుతుపవనాలు విస్తరించే అవకాశం ఉందని పేర్కొంది.పలు జిల్లాలకు హెచ్చరికలు: ముంబైతో పాటు రాయగఢ్, పూణే, రత్నగిరి జిల్లాలను కూడా ఆరెంజ్ అలర్ట్లో ఉంచగా, థానే, పాల్ఘర్ మరియు సింధుదుర్గ్ జిల్లాలకు ‘ఎల్లో అలర్ట్’ జారీ చేశారు.
Also Read:వాట్సాప్ గ్లోబల్ హెడ్గా కునాల్