ఢిల్లీ ప్రజలకు గుడ్‌న్యూస్

గత కొన్ని రోజులుగా తీవ్రమైన ఎండలు, మండిపోతున్న ఉష్ణోగ్రతలతో అల్లాడిపోతున్న ఢిల్లీ మరియు ఎన్‌సిఆర్ (NCR) ప్రాంత ప్రజలకు ఎట్టకేలకు శనివారం భారీ ఉపశమనం లభించింది. నగరంలో హఠాత్తుగా కురిసిన వర్షం, బలమైన ఈదురు గాలుల కారణంగా వాతావరణం ఒక్కసారిగా చల్లబడింది.

శనివారం ఉదయం పూట ఎండ తీవ్రత, ఉక్కపోతతో ప్రారంభమైనప్పటికీ.. మధ్యాహ్నానికి రాజధానిలోని పలు ప్రాంతాల్లో దట్టమైన నల్లటి మేఘాలు కమ్ముకున్నాయి. పలు చోట్ల తేలికపాటి నుండి మోస్తరు వర్షం కురిసింది. దీనికి తోడు వీచిన బలమైన గాలులు ఉష్ణోగ్రతలను గణనీయంగా తగ్గించడంతో, నిప్పుల కొలిమిలా మారిన వేసవి ఉష్ణోగ్రతల నుండి నగరవాసులకు ఉపశమనం దొరికింది.

ఢిల్లీలో గత కొన్ని రోజులుగా ఎండ తీవ్రత విపరీతంగా పెరిగింది, ఉష్ణోగ్రతలు నిరంతరం 43 డిగ్రీల సెల్సియస్ మార్కును దాటుతూ వచ్చాయి. భారత వాతావరణ శాఖ (IMD) తెలిపిన వివరాల ప్రకారం.. శుక్రవారం నాడు ఢిల్లీ, హర్యానా, పంజాబ్ రాష్ట్రాల్లోని పలు ప్రాంతాల్లో తీవ్రమైన వడగాల్పులు నమోదయ్యాయి.

నగరంలోని ఇతర ప్రాంతాల్లో కూడా ఉష్ణోగ్రతలు మండిపోయాయి. రిడ్జ్ (Ridge) ప్రాంతంలో అత్యధికంగా 44.4 డిగ్రీల సెల్సియస్ నమోదు కాగా.. పాలం, లోధి రోడ్, అయా నగర్ ప్రాంతాలలో 43 డిగ్రీల కంటే ఎక్కువ ఉష్ణోగ్రతలు నమోదయ్యాయి. అయితే, ముందస్తు రుతుపవన (Pre-monsoon) కదలికల కారణంగా వాతావరణంలో మార్పులు వస్తాయని, వర్షాలు కురిసే అవకాశం ఉందని వాతావరణ శాఖ ముందుగానే అంచనా వేసింది. శనివారం కురిసిన ఈ అకాల వర్షం నిరంతర ఎండలతో ఇబ్బంది పడుతున్న ప్రయాణికులకు, స్థానికులకు తక్షణ ఉపశమనాన్ని ఇచ్చింది.

Also Read:Keralam:సెక్స్ రాకెట్ ముఠా గుట్టు రట్టు