బాహుబలి 2 తర్వాత రానా దగ్గుబాటి మరో యుద్ధానికి సిద్ధమయ్యాడు. తెలుగు, తమిళ్, హిందీ అన్న తేడా లేకుండా అన్ని భాషల్లో వరుస ఆఫర్లతో దూసుకుపోతున్న రానా… బాహుబలి సినిమాలో లాగా కత్తులు, బాణాలతో కాకుండా దేశాల మధ్య యుద్ధాలు జరిగితే ఆర్మీ , నేవీ కలిసి ఎలా అయితే యుద్ధాలు చేస్తాయో ప్రేక్షకులకు చూపించడానికి ముందుకువస్తున్నాడు.
ఘాజీ అనే ఇంటర్నేషనల్ సినిమాలో నటిస్తున్నాడు రానా. తెలుగుతో పాటు తమిళ, హిందీ భాషల్లో తెరకెక్కుతున్న ఈ సినిమాతో సంకల్ప్ రెడ్డి దర్శకుడిగా పరిచయం అవుతున్నాడు. పీవీపీ సినిమా బ్యానర్ పై రూపొందుతున్న ఈ సినిమాలో రానా లుక్ ఎలా ఉండబోతుందో రివీల్ అయ్యింది. ఇటీవల టైటిల్ లోగోను విడుదల చేసిన చిత్రయూనిట్, తాజాగా నావెల్ ఆఫీసన్ యూనిఫాంలో ఉన్న రానా ఫోటోను విడుదల చేసింది.
‘ఘాజీ’ అనే పేరుగల జలాంతర్గామి 1971 ఇండియా- పాకిస్థాన్ యుద్ధంలో ఎలాంటి పాత్ర పోషించింది అనే నేపథ్యంలో తెరకెక్కిస్తున్న చిత్రమిది. ఇప్పటివరకు ఇలాంటి కాన్సెప్ట్‌తో ఏ భారతీయ సినిమా రాలేదు. దీంతో ఈ సినిమా పట్ల అందరిలోనూ ఆసక్తి నెలకొంది. రానా దగ్గుబాటి, తాప్సీ పన్ను, కేకే మెనన్ ప్రధాన పాత్రల్లో నటిస్తున్నారు. వచ్చే ఏడాది ఫిబ్రవరి 17, 2017లో ఈ సినిమా విడుదలకు సన్నాహాలు చేస్తున్నారు.
