ఈసారి CJP టార్గెట్..ఎన్నికల కమిషన్!

ఓటర్ల హక్కులకు భంగం కలిగిస్తున్నారంటూ కాక్రోచ్ జనతా పార్టీ (CJP) గురువారం ప్రధాన ఎన్నికల కమిషనర్ (CEC) జ్ఞానేష్ కుమార్‌పై తీవ్ర స్థాయిలో విరుచుకుపడింది. ఆయన వెంటనే పదవికి రాజీనామా చేయాలని డిమాండ్ చేస్తూ 48 గంటల గడువు విధించింది. లేనిపక్షంలో ‘జంతర్ మంతర్ 2.0’ పేరుతో దేశవ్యాప్త ఆందోళనలు చేపడతామని హెచ్చరించింది.

ఢిల్లీలో ఏర్పాటు చేసిన విలేకరుల సమావేశంలో CJP జాతీయ కన్వీనర్ అభిజీత్ దీప్కే, సహ కన్వీనర్లు సౌరవ్ దాస్, అశుతోష్ రాంకాతో కలిసి మాట్లాడారు. ఈ సందర్భంగా ‘ఎలక్షన్ కమిషన్ ఠీక్ కరో’ (ఎన్నికల సంఘాన్ని సరిచేయండి) పేరిట ప్రచారాన్ని ప్రకటించారు.

ఓటర్ల జాబితా ప్రత్యేక ముమ్మర సవరణ (SIR) ప్రక్రియలో భాగంగా 30 రాష్ట్రాలు మరియు కేంద్రపాలిత ప్రాంతాలలో దాదాపు 13 కోట్లకు పైగా (మొత్తం ఓటర్లలో 13-14%) ఓటర్ల పేర్లను ముసాయిదా జాబితాల నుండి తొలగించడంపై CJP తీవ్ర అభ్యంతరం వ్యక్తం చేసింది. ఓటర్ల పేర్ల తొలగింపు చట్టబద్ధమైనదేనని నిరూపించాల్సిన బాధ్యత కేంద్ర ఎన్నికల సంఘానిదేనని స్పష్టం చేసింది.

ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి గత 10 నెలల్లో ఓటర్ల చేరికలు, తొలగింపులు మరియు డేటా కేంద్రీకరణ నిర్ణయాలపై కనీసం 14 సార్లు తమ రాతపూర్వక అభ్యంతరాలను వ్యక్తం చేశారు.

CJP ప్రధాన డిమాండ్లు:

సిఇసి రాజీనామా & విచారణ: జ్ఞానేష్ కుమార్ తన పదవికి వెంటనే రాజీనామా చేయాలి మరియు ఎస్.ఐ.ఆర్ (SIR) నిర్ణయాలపై స్వతంత్ర విచారణ జరిపించాలి.

Also Read:బాలాపూర్ లడ్డూ చరిత్ర…

ఎస్.ఐ.ఆర్ నిలిపివేత: ప్రస్తుత ఓటర్ల తొలగింపు ప్రక్రియను నిలిపివేసి, జనవరి 2025 ఓటర్ల జాబితాను పునరుద్ధరించాలి. సంబంధిత రికార్డులన్నింటినీ సుప్రీంకోర్టుకు లేదా న్యాయ సమీక్షా కమిటీకి అప్పగించాలి.

నియామక చట్టంలో సంస్కరణలు: 2023 నాటి ఎన్నికల కమిషనర్ల నియామక చట్టాన్ని రద్దు చేసి, మరింత పారదర్శకమైన వ్యవస్థను తీసుకురావాలి.