స్మార్ట్ఫోన్ ప్రతి ఒక్కరి జీవితంలో కీలకంగా మారింది. కాల్స్, మెసేజ్‌లు, సోషల్ మీడియా, ఆన్‌లైన్ చెల్లింపులు, వీడియోలు.. ఇలా ఎన్నో అవసరాలకు ఫోన్‌ను ఉపయోగిస్తున్నారు. అయితే, కొంతమందికి ఫోన్ బ్యాటరీ త్వరగా అయిపోవడం పెద్ద సమస్యగా మారుతోంది. అయితే కొన్ని సులభమైన అలవాట్లను పాటించడం ద్వారా రోజంతా బ్యాటరీ ఛార్జింగ్‌ను ఎక్కువసేపు వినియోగించుకోవచ్చు.
ఫోన్‌లో ఎక్కువ బ్యాటరీ వినియోగించే అంశాల్లో స్క్రీన్ ఒకటి. బ్రైట్‌నెస్‌ను ఎప్పుడూ గరిష్ఠ స్థాయిలో ఉంచకుండా అవసరానికి తగ్గట్టుగా సర్దుబాటు చేసుకోవాలి. ఆటో బ్రైట్‌నెస్ ఆప్షన్‌ను ఉపయోగించడం వల్ల పరిసరాల వెలుతురుకు అనుగుణంగా స్క్రీన్ ప్రకాశం మారుతుంది. దీంతో బ్యాటరీ వినియోగం తగ్గే అవకాశం ఉంటుంది.
కొన్ని యాప్స్‌ను ఉపయోగించకపోయినా అవి బ్యాక్‌గ్రౌండ్‌లో పనిచేస్తూ బ్యాటరీని ఖర్చు చేస్తుంటాయి. సెట్టింగ్స్‌లో బ్యాటరీ వినియోగ వివరాలను పరిశీలించి, ఎక్కువ ఛార్జింగ్ తీసుకుంటున్న యాప్స్‌ను గుర్తించాలి. అవసరం లేని యాప్స్‌కు బ్యాక్‌గ్రౌండ్ కార్యకలాపాలను పరిమితం చేయాలి.
ఫోన్ బ్యాటరీని తరచూ పూర్తిగా ఖాళీ అయ్యే వరకు ఉపయోగించడం, ఎక్కువసేపు 100 శాతం ఛార్జింగ్‌తో ఉంచడం అలవాటుగా చేసుకోకపోవడం మంచిది. ఫోన్‌లో బ్యాటరీ ప్రొటెక్షన్ లేదా ఛార్జింగ్ లిమిట్ సదుపాయం ఉంటే ఉపయోగించుకోవచ్చు. కొన్ని ఫోన్లలో 80 శాతం వరకు ఛార్జింగ్ పరిమితిని ఎంచుకునే అవకాశం ఉంటుంది. అయితే, ఇది మోడల్‌ను బట్టి మారుతుంది.
Also Read:మాజీ సీఎం విజయన్‌కు షాక్
అధిక ఉష్ణోగ్రతలు బ్యాటరీ పనితీరుపై ప్రతికూల ప్రభావం చూపుతాయి. ఎండలో ఎక్కువసేపు ఫోన్‌ను ఉంచడం, ఛార్జింగ్ సమయంలో దుప్పట్లు లేదా దిండు కింద పెట్టడం వంటివి నివారించాలి. ఫోన్ అధికంగా వేడెక్కితే కొంతసేపు ఉపయోగించడం ఆపి చల్లబడేలా చూడాలి.
ఫోన్ ఆపరేటింగ్ సిస్టమ్, యాప్స్‌ను ఎప్పటికప్పుడు అప్‌డేట్ చేసుకోవాలి.