బిగ్ బాస్ రియాల్టీ షో తెలుగులో సూపర్ హిట్ అయిన సంగతి తెలిసిందే. జూ ఎన్టీఆర్ హోస్ట్ చేసిన మొదటి సీజన్ ఎఫెక్టుతో స్టార్ మాటీవీ రేటింగ్స్ అమాంతం పెరిగిపోగా….నాని హోస్ట్ చేసిన రెండో సీజన్ ఆ స్థాయికి వెళ్లక పోయినా మంచి హిట్టయింది. ఇక 2019లో ప్రసారం కాబోయే బిగ్ బాస్ తెలుగు సీజన్ 3 కోసం కసరత్తు మొదలైంది.
షో హోస్ట్, కంటెస్టెంట్ల ఎంపిక ప్రక్రియ ప్రారంభమైంది. ఈ సారి షోను ఎవరు హోస్ట్ చేస్తారనేది ఇంకా ఫైనల్ కాలేదు. కొన్నిరోజుల క్రితం మెగాస్టార్ పేరు వినిపించగా, తాజాగా విక్టరీ వెంకటేష్ పేరు తెరపైకి వచ్చింది. ఈ విషయంలో అఫీషియల్ కన్ఫర్మేషన్ రావాల్సి ఉంది. ఇక ‘బిగ్ బాస్ 3’ కోసం అంతా ఎంతో ఆసక్తిగా ఎదురుచూస్తున్నారు. దాంతో ‘బిగ్ బాస్ 3’ షోను సాధ్యమైనంత త్వరగా ప్రారంభించడానికి నిర్వాహకులు సన్నాహాలు చేసుకుంటున్నారు.
ఈ సారి బిగ్ బాస్ హౌస్‌లో సందడి చేయబోయేది వీరేనంటూ కొంతమంది సెలబ్రిటీల పేర్లు వినిపిస్తున్నాయి. రేణు దేశాయ్ .. ఉదయభాను .. శోభిత ధూళిపాల .. గద్దె సిందూర .. యూట్యూబ్ స్టార్ జాహ్నవి, వరుణ్ సందేశ్ .. కమల్ కామరాజు .. జాకీ .. హేమచంద్ర .. రఘు మాస్టర్ .. ‘జబర్దస్త్’ పొట్టి నరేశ్ తదితరులు పాల్గొననున్నారనే ప్రచారం జరుగుతోంది.
