తమిళ హీరో సూర్య సినిమాల్లోనే కాదు బయట సామాజిక కార్యక్రమాల్లో ఎంతో యాక్టివ్‌గా ఉంటారు. సామాజికసేవను బాధ్యతగా తీసుకుంటారు. ఇప్పటికే సూర్య స్థాపించిన ‘అగరం’ ఫౌండేషన్ ద్వారా వేలాది మంది పేద పిల్లలకు ఉచితంగా విద్యనందిస్తున్నాడు. ఇంకా ఎందరికో స్కాలర్ షిప్‌లు అందచేస్తున్నాడు. తమిళనాట ఎలాంటి విపత్తులు సంభవించినా వెంటనే స్పందించి తన వంతు సాయం చేస్తుంటాడు సూర్య. ఇప్పుడు మరోసారి తన మంచి మనసు చాటుకున్నారు ఈ హీరో.
ఒక వైపున నిర్మాతగానూ .. మరో వైపున హీరోగాను సూర్య వరుస సినిమాలు చేసుకుంటూ వెళుతున్నాడు. ఇటీవల కార్తీ హీరోగా ఆయన తమిళంలో ‘కడైకుట్టి సింగం’ సినిమాను నిర్మించాడు. తెలుగులో ఈ సినిమా ‘చినబాబు’ పేరుతో ప్రేక్షకుల ముందుకు వచ్చింది. వ్యవసాయం. రైతుల నేపథ్యంలో వచ్చిన సినిమా ఇది. తెలుగులో ఈ సినిమా పెద్దగా ఆకట్టుకోలేకపోయింది.
అయితే ఈ సినిమా తమిళంలో మాత్రం మంచి విజయాన్నా అందుకుంది. ఈ నేపథ్యంలో తాజాగా ఈ చిత్ర సక్సెస్ మీట్‌ను నిర్వహించారు చిత్ర బృందం. ఈ కార్యక్రమంలో హీరో సూర్య మాట్లాడుతూ .. తమిళనాడులోని రైతుల కోసం కోటి రూపాయల విరాళం అందించనున్నట్లు ప్రకటించాడు. ఈ మొత్తాన్ని తన ‘అగరం’ ఫౌండేషన్ ద్వారా ఖర్చు చేయనున్నారు. ప్రస్తుతం సూర్య సెల్వరాఘవన్‌ దర్శకత్వంలో ఎన్‌.జీ.కే మూవీలో నటిస్తున్నాడు.
