ఓ సినిమా భారీ బడ్జెట్‌తో రూపొందించడమే కాదు. అది ప్రజాదరణ పొందేలా ప్రేక్షకులకు చేరువ చేయాలి. దాని కోసం కొత్త పద్ధతులు పాటిస్తుంటారు. అందులో ఆ చిత్రంలో తారలంతా శ్రమించాల్సి వస్తుంది. చిత్రంలో నటించడానికి అంగీకరించినప్పుడే ప్రచారంలో నటులు భాగస్వామ్యం అందించాలని కమిట్‌ అవుతున్నారు. అలనాటి తార సావిత్రి జీవితం ఆధారంగా మహానటి చిత్రం రూపుదిద్దుకుంటోంది. కీర్తి సురేశ్‌ టైటిల్‌ రోల్‌ పోషిస్తుంది. నాగ్‌ అశ్విన్‌ దర్శకత్వం వహిస్తున్నారు. ఈ సినిమాలో సమంత, విజరు దేవరకొండ ప్రధాన పాత్రల్లో నటిస్తున్నారు. ఈ సినిమా ఈ నెల 9వ తేదీన విడుదల కాబోతోంది.
అయితే చిత్రంలో మధుర‌వాణి పాత్ర పోషించిన సమంత నెటిజ‌న్స్‌కి ఛాలెంజ్ విసిరింది. ‘మాయా బజార్‌’ చిత్రం లోని ‘అహ నా పెళ్లంట.. ఓహో నా పెళ్లంట’ పాటకు తమదైన శైలిలో నృత్యం చేస్తే వారిలో బాగా అనిపించిన కొందరికి గిఫ్ట్‌లు ఇస్తానని హీరోయిన్‌ సమంత ఇటీవల ట్విట్టర్‌లో ప్రకటించింది. వైజయంతి మూవీస్‌ వారి మహానటి ఫన్ ఛాలెంజ్ పేరిట మొదలైన ఈ పోటీకి మంచి స్పందన వస్తోంది. చాలా మంది అమ్మాయిలు ‘అహ నా పెళ్లంట.. ఓహో నా పెళ్లంట’ పాటకు డ్యాన్స్ చేస్తూ ఆ వీడియోలను తీసి ట్యాగ్‌చేసి ట్విట్టర్‌లో అప్‌లోడ్‌ చేస్తున్నారు.
వాటిల్లో కొందరు చిన్నారులు చేసిన డ్యాన్స్ లు సమంతకి బాగా నచ్చాయి. వారి డ్యాన్స్ వీడియోను తన ట్విట్టర్ ఖాతాలో పోస్ట్ చేసింది. లవ్లీ అంటూ కామెంట్ చేసి చప్పట్లు కొట్టింది. భారీ తారాగణంతో తెరకెక్కుతున్న ఈ చిత్రం ఏ మేరకు అభిమానులను అలరిస్తుందో చూడాలి.
