సూపర్ స్టార్ రజినీకాంత్ నటించిన తాజా చిత్రం ‘కాలా’. కబాలి ఫేమ్ రంజిత్ కుమార్ ఈ చిత్రానికి దర్శకుడు. హ్యూమా క్యురేషి, నానా పటేకర్ వంటి ప్రముఖ నటులు ఈ చిత్రంలో నటించారు. రజనీకాంత్ అల్లుడు ధనుష్ స్వయంగా ఈ చిత్రాన్ని నిర్మించడం విశేషం. ఇక ఈ సినిమా జూన్ 7 నే చిత్రం ప్రేక్షకుల ముందుకు రానుంది.
ప్రస్తుత పరిస్థితుల నేపధ్యంలో కర్నాటకలో ‘కాలా’ సినిమాపై నీలినీడలు కమ్ముకోవడంతో విడుదల అనుమానమే అన్నట్లుగా తెలుస్తోంది. ఇక గతంలో కావేరి జలాల విషయంలో రజీనికాంత్ తీసుకున్ననిర్ణయం కారణంగా సినిమా విడుదలను అడ్డుకుంటామంటున్నారు కన్నడ చళువళి వాటాల్‌ పార్టీ అధ్యక్షుడు వాటాల్‌ నాగరాజ్‌. శనివారం నాగరాజు ప్రెస్ క్లబ్‌లో మట్లాడుతూ..కాలా సినిమాను ఇక్కడ విడుదల చేస్తే పోరాటం ఉదృతం చేస్తామని తెలిపారు.
రజినీ సినిమాలతో పాటు కమల్ హాసన్ సినిమాలు కూడా విడుదల కానివ్వబోమని ఆయన హెచ్చరించారు. దీంతో కన్నడలో కొన్ని సంఘాలు కూడా దీనికి మద్దతు ఇస్తున్నాయి. ఇలాంటి సమయంలో పరిస్థితులు ఎక్కడికి దారితీస్తాయో అని సినిమా యూనిట్ ఆలోచిస్తుందట.
