రాహుల్ అసత్యప్రచారం..మోదీ ఫైర్

ఏప్రిల్-జూన్ త్రైమాసికంలో నమోదు చేయబడిన భారతదేశపు 7.8 శాతం జీడీపీ (GDP) వృద్ధి రేటుపై ప్రధాని నరేంద్ర మోదీ హర్షం వ్యక్తం చేశారు. అంతర్జాతీయంగా తీవ్ర అనిశ్చితులు ఉన్నప్పటికీ, భారతదేశం సాధించిన ఈ బలమైన ఆర్థిక పురోగతి దేశ ప్రజల పట్టుదలకు, నిబద్ధతకు నిదర్శనమని ఆయన కొనియాడారు. ఇదే సమయంలో భారత ఆర్థిక వ్యవస్థపై నిరాశావాదాన్ని, అబద్ధాలను ప్రచారం చేస్తున్న వారిపై ఆయన పరోక్షంగా విరుచుకుపడ్డారు.

ఈ వృద్ధి గణాంకాలపై ఇన్‌స్టాగ్రామ్ వేదికగా స్పందించిన ప్రధాని మోదీ, దేశ ప్రజలకు అభినందనలు తెలియజేశారు. ప్రపంచ ఆర్థిక వ్యవస్థలు ఇబ్బందుల్లో ఉన్నప్పటికీ భారత్ సాధిస్తున్న వేగవంతమైన పురోగతిని ప్రత్యేకంగా ప్రస్తావించారు.

నా తోటి పౌరులకు హృదయపూర్వక అభినందనలు. 7.8 శాతం వృద్ధి రేటుతో దేశం ఎంతో ఉత్సాహంగా ఉంది. దేశ ప్రజల నిబద్ధతను, శ్రమకోర్చే తత్వాన్ని నేను అభినందిస్తున్నాను; ఇది మనందరి ఉమ్మడి శక్తికి నిదర్శనం అని ప్రధాని పేర్కొన్నారు. ప్రస్తుత అంతర్జాతీయ పరిస్థితులను ప్రస్తావిస్తూ.. ప్రపంచవ్యాప్తంగా యుద్ధాలు, వివాదాలు సరుకుల సరఫరా వ్యవస్థలను (Supply chains) తీవ్రంగా దెబ్బతీశాయని మోదీ అన్నారు. 2020లో కోవిడ్ సంక్షోభం ప్రారంభమైనప్పటి నుండి ప్రపంచవ్యాప్తంగా స్థిరత్వం లోపించిందని, అటువంటి పరిస్థితుల్లోనూ భారత్ వేగంగా అభివృద్ధి చెందుతోందని చెప్పారు.

ప్రపంచం యుద్ధాలు, వివాదాల సుడిగుండంలో చిక్కుకుంది. అన్ని వైపులా సంక్షోభాలే కనిపిస్తున్నాయి. 2020 కోవిడ్ కాలం నుండి ఎక్కడా స్థిరత్వం లేదు. అయినప్పటికీ, భారతదేశం మాత్రం వేగంగా ముందుకు సాగుతోంది అని ఆయన తెలిపారు. దేశ ఆర్థిక వ్యవస్థపై అనుమానాలు వ్యక్తం చేసే విమర్శకులను లక్ష్యంగా చేసుకుని మాట్లాడిన మోదీ, నిరాశావాదం మరియు అసత్య ప్రచారాలు దేశ పురోగతిని అడ్డుకోలేవని స్పష్టం చేశారు.

Also Read:యశ్‌ను టార్గెట్ చేస్తున్నారు!

కాంగ్రెస్ నాయకుడు రాహుల్ గాంధీని ఉద్దేశించి పరోక్షంగా చురకలంటిస్తూ.. మరోవైపు దేశంలో కొందరు నిరాశావాదంలో కూరుకుపోయి, ‘జూట్ కీ గూంజ్’ (అబద్ధాల ప్రచారం) చేస్తూ నైరాశ్యాన్ని వ్యాప్తి చేయడానికి ప్రయత్నిస్తున్నారు” అని వ్యాఖ్యానించారు.