తెలంగాణ సీఎం కేసీఆర్ ఈ నెల 23నుంచి ఆంధ్రప్రదేశ్‌, ఒడిశా, పశ్చిమ్‌ బంగ, దేశ రాజధాని దిల్లీలో పర్యటించనున్నారు. ఈ మేరకు ఆయన పర్యటన షెడ్యూల్‌ ఖరారైంది. ప్రత్యేక విమానంలో సీఎం కేసీఆర్, కుటుంబ సభ్యులతో కలిసి ఈ నెల 23న ఉదయం 10గంటలకు బేగంపేట విమానాశ్రయం నుంచి విశాఖకు బయల్దేరతారు. ముందుగా ఆయన విశాఖకు వెళ్లి.. శారదా పీఠాన్ని సందర్శించుకొని రాజశ్యామల దేవాలయంలో ప్రత్యేక పూజలు చేయనున్నారు. అక్కడ స్వామి స్వరూపానందేంద్ర స్వామి ఆశీస్సులు తీసుకోనున్నారు సీఎం కేసీఆర్.
అనంతరం ఒడిశా రాజధాని భువనేశ్వర్‌కు సీఎం కేసీఆర్ వెళ్లనున్నారు. 23న సాయంత్రం ఒడిశా సీఎం నవీన్ పట్నాయక్‌తో కేసీఆర్ సమావేశమై ఆ రోజు రాత్రి సీఎం అధికార నివాసంలో బస చేయనున్నారు. 24న ఉదయం కోణార్క్ దేవాలయం, జగన్నాథ దేవాలయాన్ని సందర్శించుకొని మధ్యాహ్న భోజనం అనంతరం.. పశ్చిమ బెంగాల్ రాజధాని కోల్‌కతాకు కేసీఆర్ పయనం కానున్నారు. 24న సాయంత్రం బెంగాల్ సీఎం మమతా బెనర్జీతో కేసీఆర్ భేటీ కానున్నారు. ఆ తర్వత కాళీమాత ఆలయాన్ని సందర్శించనున్నారు. అదే రోజు రాత్రికి బెంగాల్ నుంచి ఢిల్లీకి వెళ్లనున్నారు సీఎం కేసీఆర్.
25 నుంచి మూడు రోజుల పాటు ఢిల్లీలోనే కేసీఆర్ ఉండనున్నారు. ప్రధాని నరేంద్ర మోదీని మర్యాదపూర్వకంగా కలవనున్నారు. పలువురు కేంద్రమంత్రులతో భేటీ కానున్నారు. రాష్ర్టానికి సంబంధించిన అంశాలపై కేంద్రమంత్రులతో సీఎం కేసీఆర్ చర్చించనున్నారు. బీఎస్పీ అధినేత్రి మాయావతి, యూపీ మాజీ సీఎం అఖిలేష్ యాదవ్ తోనూ కేసీఆర్ సమావేశమై ఫెడరల్ ఫ్రంట్‌పై చర్చించనున్నారు.
