ఇరాన్ విదేశాంగ మంత్రి అబ్బాస్ అరాఘ్చీ నేతృత్వంలోని ఉన్నత స్థాయి ప్రతినిధి బృందం శనివారం పాకిస్థాన్ రాజధాని ఇస్లామాబాద్కు చేరుకుంది. అయితే, ఈ పర్యటనలో అమెరికా ప్రతినిధులతో నేరుగా చర్చలు జరిపే అవకాశం లేదని ఇరాన్ విదేశాంగ శాఖ స్పష్టం చేసింది.
అమెరికాతో ఎలాంటి ప్రత్యక్ష సమావేశాలు షెడ్యూల్ కాలేదని ఇరాన్ ప్రతినిధి ఇస్మాయిల్ బఘాయ్ ‘X’ (ట్విట్టర్) వేదికగా తెలిపారు. ఇరాన్ తన అభిప్రాయాలను మధ్యవర్తిత్వం వహిస్తున్న పాకిస్థాన్కే తెలియజేస్తుందని ఆయన పేర్కొన్నారు.
అమెరికా-ఇరాన్ మధ్య ఉద్రిక్తతలను తగ్గించడానికి పాకిస్థాన్ కీలక పాత్ర పోషిస్తోంది. ఇరాన్ మంత్రి అరాఘ్చీ పాకిస్థాన్ ప్రధాని షెహబాజ్ షరీఫ్, ఆర్మీ చీఫ్ జనరల్ అసిమ్ మునీర్తో సమావేశమై ప్రాంతీయ పరిస్థితులపై చర్చించనున్నారు.
ఇదే సమయంలో అమెరికా అధ్యక్షుడు డొనాల్డ్ ట్రంప్ పంపిన ప్రత్యేక ప్రతినిధులు స్టీవ్ విట్కాఫ్, జారెడ్ కుష్నర్ కూడా ఇస్లామాబాద్ చేరుకుంటున్నారు. వారు పాకిస్థాన్ అధికారుల ద్వారా ఇరాన్తో పరోక్షంగా సంప్రదింపులు జరుపుతారని సమాచారం.ఈ చర్చల ద్వారా ఇరాన్-ఇజ్రాయెల్ యుద్ధాన్ని ముగించి, ప్రాంతీయ శాంతిని పునరుద్ధరించడమే లక్ష్యమని పాకిస్థాన్ ప్రభుత్వం భావిస్తోంది.
Also Read:కేసీఆర్, కేటీఆర్, హరీశ్కు హైకోర్టులో రిలీఫ్
ఇరాన్ నుంచి కొన్ని సానుకూల ప్రతిపాదనలు వస్తున్నాయని, అయితే చర్చలు ఎవరితో జరపాలో ఇరాన్ నాయకత్వంలో స్పష్టత లేదని అమెరికా అధ్యక్షుడు ట్రంప్ ఇటీవల వ్యాఖ్యానించారు.ప్రస్తుతానికి ఇరు దేశాల మధ్య నేరుగా చర్చలు జరగకపోయినా, పాకిస్థాన్ వేదికగా జరుగుతున్న ఈ పరోక్ష సంప్రదింపులు యుద్ధ విరమణకు దారితీస్తాయని అంతర్జాతీయ వర్గాలు ఆశాభావం వ్యక్తం చేస్తున్నాయి.