ఏప్రిల్ 22, 2025న జమ్మూ కాశ్మీర్లోని పహల్గామ్లో పాకిస్తాన్ మద్దతు ఉన్న ఉగ్రవాదులు జరిపిన ఘోర దాడి దేశాన్ని దిగ్భ్రాంతికి గురిచేసింది. ఈ ఘటనలో 26 మంది అమాయకులు ప్రాణాలు కోల్పోయారు. ఈ దారుణమైన దాడి జరిగి ఏడాది పూర్తవుతున్న సందర్భంగా, భారత సైన్యం ‘ఆపరేషన్ సిందూర్’ను గుర్తు చేస్తూ ఉగ్రవాదులకు తీవ్ర హెచ్చరికలు జారీ చేసింది.
మానవత్వపు ఎల్లలు దాటినప్పుడు, స్పందన నిర్ణయాత్మకంగా ఉంటుంది. న్యాయం జరిగింది. భారత్ ఐక్యంగా ఉంది అని ADG PI (Army Digital Ground Post Interaction) సామాజిక మాధ్యమం ‘X’ వేదికగా పేర్కొంది. అంతేకాక కొన్ని సరిహద్దులను ఎప్పుడూ దాటకూడదు. భారత్ దేన్నీ మర్చిపోదు అని ఒక గ్రాఫిక్ ద్వారా స్పష్టం చేసింది.
ఆపరేషన్ సిందూర్ (మే 7, 2025): పహల్గామ్ దాడికి ప్రతీకారంగా భారత సైన్యం మే 7, 2025న ‘ఆపరేషన్ సిందూర్’ చేపట్టింది. ఈ ఆపరేషన్లో భాగంగా పాకిస్తాన్ మరియు పాక్ ఆక్రమిత కాశ్మీర్ (PoJK) లోని లష్కరే తోయిబా, జైషే మహ్మద్, హిజ్బుల్ ముజాహిదీన్ వంటి సంస్థల తొమ్మిది ప్రధాన ఉగ్రవాద లాంచ్ ప్యాడ్లను భారత్ ధ్వంసం చేసింది. ఈ దాడిలో 100 మందికి పైగా ఉగ్రవాదులు హతమయ్యారు.
పహల్గామ్ దాడికి పాల్పడిన ముగ్గురు కీలక ఉగ్రవాదులను గతేడాది జూలైలో భారత భద్రతా దళాలు ‘ఆపరేషన్ మహాదేవ్’ ద్వారా వెతికి పట్టుకుని మట్టుబెట్టాయి.పహల్గామ్ దాడిలో ప్రాణాలు కోల్పోయిన ప్రశాంత కుమార్ శతపతీ భార్య ANIతో మాట్లాడుతూ, తన భర్తను కోల్పోయిన తర్వాత జీవితం పూర్తిగా మారిపోయిందని, ప్రభుత్వం ఇచ్చిన హామీలను త్వరగా నెరవేర్చాలని కోరారు.
భారత్పై ఉగ్రదాడి జరిగితే తగిన సమాధానం ఇస్తాం. ఉగ్రవాదాన్ని ప్రోత్సహించే ప్రభుత్వానికి, మాస్టర్మైండ్లకు మధ్య మేము తేడా చూపము అని ప్రధాని మోదీ స్పష్టం చేశారు.
Also Read:మళ్లీ వచ్చేది బీఆర్ఎస్ సర్కారే: కేసీఆర్