`ముకుంద, కంచె వంటి విల‌క్ష‌ణ చిత్రాల‌తో మెప్పించిన మెగా హీరో వరుణ్ తేజ్ క‌థానాయ‌కుడిగా హిట్ చిత్రాల నిర్మాత దిల్‌రాజు నిర్మిస్తోన్న చిత్రం `ఫిదా`. శ్రీమ‌తి అనిత స‌మ‌ర్ప‌ణ‌లో శ్రీ వెంక‌టేశ్వ‌ర క్రియేష‌న్స్ బ్యాన‌ర్‌పై శేఖర్ కమ్ముల ద‌ర్శ‌క‌త్వంలో ఈ సినిమా తెర‌కెక్కుతోంది. సాయిప‌ల్ల‌వి హీరోయిన్‌గా నటించింది. టీజర్, ట్రైలర్, పాటలతో ఆకట్టుకుని సినిమా విజయంపై పాజిటివ్ క్రేజ్ క్రియేట్ చేసిన చిత్ర టీమ్ తాజాగా మరొక ట్రైలర్ ను రిలీజ్ చేసింది. ఇంతకు ముందు విడుదలచేసిన ట్రైలర్ కన్నా ఈ ట్రైలర్ తో అసలు సినిమా స్వభావం ఏమిటి, ప్రధాన పాత్రలు ఎలా ఉండబోతున్నాయి అనేది క్లియర్ గా తెలిసిపోతోంది.
శేఖర్ కమ్ముల రాసిన ఈ లవ్ స్టోరీలో అమెరికా అబ్బాయిగా వరుణ్ తేజ్ స్టైలిష్ గా కనిపిస్తుండగా తెలంగాణా గడసరి అమ్మాయిగా సాయి పల్లవి తన స్లాంగ్ తో అదరగొడుతోంది. ట్రైలర్ చూశాక సినిమాలో విభిన్న మనస్తత్వాలు కలిగిన ఇద్దరు ప్రేమికుల మధ్య నడిచే సరికొత్త రొమాంటిక్ ట్రాక్ మంచి ఎంటర్టైన్మెంట్ ఇస్తుందనే నమ్మకం కలుగుతోంది. అలాగే పాత్రల డైలాగ్స్ కూడా సహజత్వానికి దగ్గరగా ఉండి కొత్తగా అనిపిస్తున్నాయి.
తెలుగు బాష తెలియని సాయి పల్లవి డబ్బింగ్ చెప్పేందుకు చాలానే కష్టపడింది. అది కూడా తెలంగాణ స్టైల్లో ‘బాడ్కోవ్ బలిసిందారా… బొక్కలిరగ్గొడతా, బద్మాష్ బలిసిందారా… బొక్కలిరగ్గొడతా’ అంటూ సాయి పల్లవి చెప్పిన డైలాగులు ఆకట్టుకుంటున్నాయి. వరుణ్ తేజ్ ఎన్నారైగా కనిపించనున్న ఈ సినిమాలో సాయి పల్లవి ఒక తెలంగాణ అమ్మాయిగా కనిపించనుంది. ఈ సినిమా సెన్సార్ కార్య‌క్ర‌మాల‌ను పూర్తి చేసుకుని జూలై 21న విడుద‌ల‌వుతుంది.
