మధ్య అమెరికా దేశమైన పనామాలో భారీ భూకంపం సంభవించింది. అక్టోబర్ 9న రిక్టర్ స్కేలుపై 7.6 తీవ్రతతో భూమి కంపించడంతో స్థానికులు తీవ్ర భయాందోళనలకు గురయ్యారు. ప్రకంపనల ధాటికి పలు భవనాలు దెబ్బతిన్నట్లు సమాచారం. భూకంపం సంభవించిన వెంటనే ప్రజలు ప్రాణాలను కాపాడుకునేందుకు ఇళ్ల నుంచి బయటకు పరుగులు తీశారు.
ఈ భారీ భూకంపం నేపథ్యంలో పసిఫిక్ మహాసముద్ర తీర ప్రాంతాల్లో సునామీ ముప్పుపై ఆందోళనలు వ్యక్తమయ్యాయి. పనామాతోపాటు కొలంబియా, ఈక్వెడార్ సహా పలు దేశాల తీర ప్రాంతాలకు సునామీ హెచ్చరికలు జారీ అయ్యాయి. దీంతో ఆయా ప్రాంతాల్లోని ప్రజలు అప్రమత్తమయ్యారు. తీర ప్రాంతాల్లో పరిస్థితిని అధికారులు పర్యవేక్షిస్తూ, ప్రజలకు అవసరమైన సూచనలు జారీ చేశారు.
అయితే తాజా అధికారిక సమాచారం ప్రకారం ఈ భూకంపానికి సంబంధించి సునామీ ముప్పు తొలగిపోయింది. దీంతో తీర ప్రాంతాల ప్రజలు కొంత ఊపిరి పీల్చుకున్నారు.
Also Read:విమర్శలకు భయపడేది లేదు!
భూకంపాల సమయంలో ప్రజలు అప్రమత్తంగా ఉండటం, అధికారుల సూచనలు పాటించడం అత్యంత ముఖ్యమని నిపుణులు సూచిస్తున్నారు. ముఖ్యంగా తీర ప్రాంతాల్లో నివసించే వారు సునామీ హెచ్చరికలు జారీ అయినప్పుడు సురక్షిత ప్రాంతాలకు వెళ్లాలని, అధికారిక ప్రకటనలు వచ్చే వరకు అప్రమత్తత కొనసాగించాలని సూచిస్తున్నారు.