ప్రభుత్వ ఉద్యోగాలు..డోప్ టెస్ట్ తప్పనిసరి!

హిమాచల్ ప్రదేశ్ ప్రభుత్వం ఒక కీలక నిర్ణయం తీసుకుంది. రాష్ట్రంలో కొత్తగా ప్రభుత్వ ఉద్యోగాల్లో చేరే అభ్యర్థులందరికీ డోప్ టెస్ట్ (మాదకద్రవ్యాల గుర్తింపు పరీక్ష) తప్పనిసరి చేయాలని ముఖ్యమంత్రి సుఖ్విందర్ సింగ్ సుఖు ఆదేశించారు. శనివారం జరిగిన పరిపాలనా కార్యదర్శుల ఉన్నత స్థాయి సమీక్షా సమావేశంలో ఆయన మాట్లాడారు. యువతను డ్రగ్స్ భూతం నుండి రక్షించడం తమ ప్రభుత్వ మొదటి ప్రాధాన్యత అని స్పష్టం చేశారు. ఈ మేరకు అన్ని ప్రభుత్వ శాఖలు తక్షణమే తగిన ఆదేశాలు జారీ చేయాలని సీఎం ఆదేశించారు.

రాష్ట్రంలో ‘చిట్టా’ (హెరాయిన్ లాంటి మాదకద్రవ్యం) వంటి డ్రగ్స్ రవాణాకు పాల్పడుతున్న ప్రభుత్వ ఉద్యోగుల వివరాలను ముఖ్యమంత్రి అడిగి తెలుసుకున్నారు. డ్రగ్స్ మాఫియాపై రాష్ట్రవ్యాప్తంగా ఒక ప్రజా ఉద్యమాన్ని ప్రారంభించామని.. అక్రమార్కులపై కఠిన చర్యలు తీసుకుంటున్నామని చెప్పారు. మే 11న డ్రగ్స్ వ్యవహారాల్లో ప్రమేయం ఉన్నట్లు తేలిన 123 మంది ప్రభుత్వ ఉద్యోగులపై చర్యలు తీసుకోవాలని ప్రభుత్వం ఆదేశించింది. వీరిలో పోలీస్ శాఖకు చెందిన 21 మందితో సహా మొత్తం 31 మంది ఉద్యోగులను ఇప్పటికే సర్వీస్ నుండి పూర్తిగా తొలగించారు (డిస్మిస్ చేశారు).

కారుణ్య నియామకాల కింద ఉద్యోగం కోసం దరఖాస్తు చేసుకున్న వారి పూర్తి వివరాలను అందించాలని ముఖ్యమంత్రి అధికారులను కోరారు. దీనివల్ల చాలా కాలంగా పెండింగ్‌లో ఉన్న కేసులపై ప్రభుత్వం త్వరగా నిర్ణయం తీసుకోగలుగుతుందని చెప్పారు. వివిధ శాఖల్లో ఖాళీగా ఉన్న పోస్టుల వివరాలను సేకరిస్తున్నామని.. త్వరలోనే 500 జూనియర్ ఆఫీస్ అసిస్టెంట్ (JOA) పోస్టులను భర్తీ చేయనున్నట్లు ప్రకటించారు.

Also Read:వెనక్కి తగ్గిన ‘పెద్ది’ నిర్మాతలు!

ఇటీవల సంభవించిన భారీ తుఫానుల కారణంగా అటవీ ప్రాంతాల్లో విరిగిపడిన లేదా నేలకూలిన చెట్ల వివరాలను సేకరించాలని సీఎం సుఖు అధికారులను ఆదేశించారు. వీటిని సకాలంలో తొలగించకపోతే రాష్ట్ర ప్రభుత్వ ఆదాయ వనరులకు భారీ నష్టం వాటిల్లుతుందని ఆందోళన వ్యక్తం చేశారు. ఈ కూలిన చెట్లను అడవుల నుండి తొలగించడానికి జూన్ 1వ తేదీ నుండి ఒక ప్రత్యేక ప్రచారాన్ని ప్రారంభించనున్నారు. అటవీ శాఖ అధికారులు దీనిని ఒక ప్రాధాన్యతాంశంగా తీసుకుని నిర్ణీత కాలపరిమితిలోగా పడిపోయిన చెట్ల తొలగింపు, విక్రయ ప్రక్రియను పూర్తి చేయాలని స్పష్టం చేశారు.