మెగాపవర్ స్టార్ రామ్‌చరణ్ ధృవ సినిమా థియేటర్లలో సందడి చేస్తోంది. పాజిటివ్ టాక్‌తో దూసుకుపోతోంది. రెండు తెలుగు రాష్ట్రాల్లో కలిపి 15 కోట్ల షేర్ సాధించింది. విడుదలయిన రెండు రోజుల్లోనే ప్రపంచవ్యాప్తంగా 22.5 కోట్ల రూపాయలు సాధించి నిర్మాతకు కాసుల వర్షం కురిపిస్తోంది. దీంతో మెగాపవర్ స్టార్ ఫ్యాన్స్ ఖుషీగా ఉన్నారు. అయితే వారి ఆనందాన్ని పైరసీ భూతం ఆవిరి చేసింది. గత రాత్రి యూట్యూబ్‌లో గుర్తుతెలియని పైరసీ నేరగాళ్లు ధృవ సినిమాను పోస్ట్ చేశారు. ఈ పరిణామంతో మెగా ఫ్యాన్స్ కంగుతిన్నారు. వెంటనే యాంటీ పైరసీ టీంతో మాట్లాడి ధృవ పైరసీని తొలగించారు.
అయితే మెగా హీరోల సినిమాలకు ఈ పైరసీ సెగ తగలడం కొత్తేమీ కాదు. గతంలో అత్తారింటికి దారేది సినిమా పైరసీపై పెద్ద ఎత్తున దుమారం రేగిన సంగతి తెలిసిందే. టాలీవుడ్ అంతా పైరసీని ప్రోత్సహించొద్దని విన్నవించుకుంటున్నా కొందరు మాత్రం ఈ పైరసీ సినిమాలతో వ్యాపారం చేసి కోట్లు దండుకుంటున్నారు. సినిమా విడుదలకు ముందు ఎన్ని జాగ్రత్తలు తీసుకుంటున్నా విడుదలయ్యాక మాత్రం ఈ పైరసీని నియంత్రిచడంలో సినీ ప్రముఖులు విఫలమవుతున్నారు. ధృవ సినిమా యూ ట్యూబ్‌లో ప్రత్యేక్షమైందనే వార్త వినగానే…ధృవ టీం తొందర అప్రమత్తమై పైరసీని తొలగించడంతో రామ్ చరణ్ కాస్త ఊపిరి పీల్చుకున్నాడు.
