బీజేపీకి రాజీనామా చేసిన కె. అన్నామలై ఈ మేరకు ఆ పార్టీ అధిష్టానానికి లేఖ రాశారు. తన లక్ష్యాలు చాలా పెద్దవని అందరినీ కలుపుకుపోయే వినూత్న ఎజెండాతో ఒక కొత్త రాజకీయ పార్టీని స్థాపించి, తమిళనాడులో జరగబోయే తదుపరి ఎన్నికల్లో పోటీ చేయనున్నట్లు ప్రకటించారు.
తమిళనాడు రాష్ట్ర రాజకీయాల విషయంలో ఉన్న భేదాభిప్రాయాల వల్లే తాను భారతీయ జనతా పార్టీ (BJP) నుండి తప్పుకుంటున్నట్లు ఆయన స్పష్టం చేశారు. తమిళనాడులో ఒక సానుకూల మార్పును తీసుకురావడానికి, ఇక్కడి రాజకీయాల శైలిని మార్చడానికి నేను ఆరేళ్ల క్రితం బీజేపీలో చేరాను అన్నారు.
అన్నిటికంటే ముఖ్యంగా, రాజకీయం అనేది కేవలం కొందరు ధనికులు, ఉన్నత వర్గాల (ఎలైట్) వారికి మాత్రమే పరిమితమైన మార్గమని, సామాన్యుడికి అక్కడ స్థానం లేదనే భావనను నేను మార్చాలనుకున్నాను. చాలా చిన్న వయసులోనే, ఎటువంటి రాజకీయ అనుభవం లేని నాపై నమ్మకం ఉంచి, ఇంతటి గొప్ప బాధ్యతలను, నాయకత్వ పదవులను అప్పగించినందుకు బీజేపీ అధిష్ఠానానికి నేను ఎల్లప్పుడూ కృతజ్ఞుడనై ఉంటాను అని లేఖలో రాశారు.
“దశాబ్దాలుగా సాగుతున్న ఇక్కడి రాజకీయ ధోరణితో విసిగిపోయిన తమిళనాడు ప్రజలు మార్పు కోసం పరితపించారు. గత దశాబ్దంలో పలు సందర్భాల్లో మార్పులు వచ్చినప్పటికీ, అవి నిలదొక్కుకోలేకపోయాయి, ప్రజల మనసుల నుండి త్వరగానే చెరిగిపోయాయి” అని ఆయన అన్నారు.
జాతీయ పార్టీలు ఎప్పుడూ తమిళనాడు ప్రజలకు అర్థమయ్యే భాషలో మాట్లాడలేదని, ఆ నమ్మకాన్ని మార్చడానికి తాను ప్రయత్నించానని అన్నామలై పేర్కొన్నారు. పార్టీ లోపల, బయట నుండి అనేక అడ్డంకులు ఎదురైనప్పటికీ, తాను ఈ ప్రయత్నంలో ‘సమర్థవంతమైన విజయాన్ని’ సాధించగలిగానని ఆయన చెప్పారు.గత 18 నెలలుగా పార్టీ అగ్ర నాయకత్వంతో నేను జరిపిన పలు చర్చలను, వ్యక్తపరిచిన భేదాభిప్రాయాలను ఈ సందర్భంగా గుర్తు చేసుకుంటున్నాను అని తెలిపారు.
తమిళనాడులో అభివృద్ధి ఆధారిత, సాంస్కృతిక మూలాలు కలిగిన రాజకీయాలను ముందుకు తీసుకెళ్లడంపై నాకున్న ఆలోచనలతో అగ్ర నాయకత్వాన్ని ఇకపై మరింత ఇబ్బంది పెట్టాలని నేను అనుకోవడం లేదు. మా సీనియర్ నాయకత్వంతో మాట్లాడిన తర్వాత, తమిళనాడు విషయమై మా అభిప్రాయాలు కలవడం లేదనే ముగింపునకు నేను వచ్చాను అని లేఖలో వివరించారు.