ఢిల్లీలోని జంతర్ మంతర్ వద్ద భారీ నిరసన కార్యక్రమం చేపట్టింది సీజేపీ. ఈ కార్యక్రమంలో పాల్గొనేందుకు CJP వ్యవస్థాపకుడు అభిజీత్ దిప్కే భారతదేశానికి చేరుకున్నారు. ఢిల్లీ విమానాశ్రయంలో బి.ఆర్. అంబేద్కర్ ఆత్మకథ ప్రతిని చేతిలో పట్టుకుని కనిపించారు.
పరీక్షల నిర్వహణలో జరిగినట్లు ఆరోపిస్తున్న లోపాలకు బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని డిమాండ్ చేస్తూ ఈ నిరసనను నిర్వహిస్తున్నారు. లడఖ్కు స్వయంప్రతిపత్తి కోరుతూ సెప్టెంబర్లో జరిగిన నిరసనల సమయంలో అరెస్ట్ అయి..ఆరు నెలల పాటు నిర్బంధంలో ఉన్న సామాజిక కార్యకర్త సోనమ్ వాంగ్చుక్ ఈ నిరసనలో పాల్గొంటానని ఇదివరకే ప్రకటించారు.
గత నెలలో జరిగిన ఒక కోర్టు విచారణ సందర్భంగా సుప్రీంకోర్టు ప్రధాన న్యాయమూర్తి జస్టిస్ సూర్యకాంత్ చేసిన కొన్ని వ్యాఖ్యలకు వ్యంగ్య ప్రతిస్పందనగా ఈ సంస్థ మొదట ఏర్పడింది. ఆ విచారణలో కొందరు వ్యక్తులను బొద్దింకలు , పరాన్నజీవులు అని ప్రస్తావించారు. అప్పటి నుండి ఇది ఒక వ్యవస్థీకృత ఉద్యమంగా మారి, ఆన్లైన్లో భారీ ఫాలోయింగ్ను సంపాదించుకుంది.
యువత కోసం, యువత చేత, యువత యొక్క రాజకీయ వేదిక అనే నినాదంతో దీని ప్రజాదరణ వేగంగా పెరిగింది. ఈ పార్టీ ఇన్స్టాగ్రామ్ ఖాతా ఇప్పటికే 2.2 కోట్ల (22 మిలియన్) ఫాలోవర్లను దాటింది. ఇది భారతీయ జనతా పార్టీ (BJP) కి ఉన్న 90 లక్షల ఫాలోవర్ల కంటే రెండింతలు ఎక్కువ. అలాగే కాంగ్రెస్ పార్టీకి ఉన్న 1.3 కోట్ల ఫాలోవర్ల కంటే కూడా ఎక్కువే.
ALso Read:కేఎల్ రాహుల్కి ఆస్కార్ ఇవ్వాలి!
కాక్రోచ్ జనతా పార్టీ (CJP) వ్యవస్థాపకుడైన 30 ఏళ్ల అభిజీత్ దిప్కే మహారాష్ట్రకు చెందినవారు. ఆయన పూణేలో జర్నలిజంలో అండర్ గ్రాడ్యుయేట్ డిగ్రీ పూర్తి చేశారు. చదువు పూర్తయిన తర్వాత పైచదువుల కోసం అమెరికా వెళ్లారు. ఇటీవల బోస్టన్ యూనివర్సిటీ నుండి పబ్లిక్ రిలేషన్స్లో రెండేళ్ల మాస్టర్స్ డిగ్రీని పూర్తి చేశారు. 2020 నుండి 2023 వరకు ఆయన ఆమ్ ఆద్మీ పార్టీ (AAP) లో సోషల్ మీడియా నిర్వహణ..ఎన్నికల ప్రచార కార్యక్రమాలలో పనిచేశారు.