టాలీవుడ్ హీరో నారా రోహిత్ చేసిన ప్రతి సినిమాలో ఎదో ఒక కొత్త అంశం ఉంటుంది. విమర్శకుల ప్రశంసలు అందుకుంటున్నా కూడా కమర్షియల్ సక్సెస్ రావడం లేదు. నారా రోహిత్ ప్రస్తుతం ‘ఆటగాళ్లు’ అనే సినిమా చేస్తున్న సంగతి తెలిసిందే. ఈ మూవీకి పరుచూరి మురళి దర్శకుడిగా వ్యవహరిస్తున్నాడు. ఫ్రెండ్స్‌ మూవీ క్రియేషన్స్‌ సంస్థ నిర్మిస్తోంది. తాజాగా ఈ సినిమాకు సంబందించిన మొదటి టీజర్ ను చిత్ర యూనిట్ విడుదల చేసింది.
ఈ సినిమా టీజర్‌ను రానా దగ్గుబాటి విడుదల చేశారు. దీన్ని నారా రోహిత్ ఫేస్‌బుక్‌ వేదికగా పంచుకున్నారు. ఈ ‘ఆటగాళ్లు’ సినిమా కోసం జగపతిబాబుతో కలిసి పనిచేయడం చాలా సంతోషంగా ఉందని నారా రోహిత్ తెలిపారు. టీజర్‌ను విడుదల చేసిన రానా దగ్గుబాటికి ధన్యవాదాలు తెలియజేశారు. ఈ చిత్ర టీజర్‌లో ఓ కొత్త తరహా రోహిత్ కనిపిస్తున్నాడు. ఒక సెలబ్రెటీ పాత్రలో డిఫెరెంట్ షేడ్స్ ఉన్నట్లు తెలుస్తోంది. మర్డర్ మిస్టరీ నేపథ్యం అని ఈజీగా అర్ధమవుతోంది. ఇక ప్రతినాయకుడు జగపతి బాబు తన సైలెంట్ పవర్ఫుల్ క్యారెక్టర్ ని మరోసారి కనిపించారు.
‘సర్‌ మీ భార్యను చంపింది మీరేనా.. సర్‌ ఇప్పుడు మీరు తీస్తున్న సినిమా ఆగిపోయినట్లేనే. ఇప్పుడు మీ అభిమానులకు ఏం చెప్పాలి అనుకుంటున్నారు’ అనే డైలాగ్స్‌తో టీజర్ ప్రారంభమైంది. నారా రోహిత్‌ను విచారిస్తూ జగపతిబాబు కనిపించారు. ‘ఆట నువ్వు మొదలు పెట్టావు. నేను ఫినిషింగ్‌ ఇస్తాను’ అంటూ జగపతిబాబు చెప్పే డైలాగ్‌ ఆసక్తికరంగా ఉంది. నారా రోహిత్, జగపతిబాబు కలిసి నటిస్తున్న ఈ చిత్రంలో బ్రహ్మానందం, సుబ్బరాజు, శ్రీతేజ్‌, చలపతిరావు, నాగినీడు, ప్రియ తదితరులు ప్రధాన పాత్రలో కనిపించనున్నారు. సాయి కార్తీక్‌ బాణీలు అందిస్తున్నారు. ఇటీవల ఈ సినిమా ఫస్ట్‌లుక్‌ను విడుదల చేశారు.
