మూడు నెలల గర్భిణీ అయిన మహిళా జర్నలిస్టును అక్టోబర్ 12న జరిగిన ర్యాలీ సందర్భంగా కాంగ్రెస్ అగ్రనేత రాహుల్ గాంధీ తోశారంటూ దాఖలైన పిటిషన్‌పై సుప్రీంకోర్టు స్పందించింది. ఈ వ్యవహారంలో రాహుల్ గాంధీతో పాటు ఇతర ప్రతివాదులు తమ వివరణ ఇవ్వాలని మంగళవారం ఆదేశించింది. ఘటనకు బాధ్యులుగా ఆరోపణలు ఎదుర్కొంటున్న వారిపై ఎఫ్‌ఐఆర్ నమోదు చేయాలని, బాధిత జర్నలిస్టుకు పరిహారం చెల్లించాలని పిటిషన్‌లో కోరారు.
భారత ప్రధాన న్యాయమూర్తి జస్టిస్ సూర్యకాంత్, జస్టిస్ జాయ్‌మాల్య బాగ్చీలతో కూడిన ధర్మాసనం ముందు ఈ పిటిషన్ ప్రస్తావనకు వచ్చింది. సీనియర్ న్యాయవాది గౌరవ్ భాటియా ఈ అంశాన్ని ధర్మాసనం దృష్టికి తీసుకెళ్లారు. సుప్రీంకోర్టు ప్రాంగణంలో ఓ మహిళా జర్నలిస్టుపై దాడి జరిగిందని ఆయన ఆరోపించారు. అయితే, ఇవి పిటిషన్‌లో చేసిన ఆరోపణలు మాత్రమేనని, ఇప్పటివరకు న్యాయస్థానం వాటిని నిర్ధారించలేదని గమనించాలి.
అక్టోబర్ 12న జరిగిన ఘటనలో జర్నలిస్టును ఓ గేటు వైపు బలంగా తోశారని, దీంతో ఆమె సమతుల్యత కోల్పోయి కిందపడబోయారని పిటిషన్‌లో పేర్కొన్నారు. పడిపోకుండా చేతులతో నేలను ఆసరాగా చేసుకున్నారని ఆరోపించారు. భద్రతా సిబ్బంది, ఇతర జర్నలిస్టులు, ప్రజలు ఉన్న రద్దీ ప్రాంతంలో ఈ ఘటన జరిగినట్లు పిటిషన్‌దారులు తెలిపారు.
ఇది జనసందోహంలో జరిగిన సాధారణ తోపులాట కాదని, ఉద్దేశపూర్వకంగా జర్నలిస్టును తోశారని పిటిషన్‌లో ఆరోపించారు. తన పట్ల అలా వ్యవహరించవద్దని ఆమె స్పష్టంగా చెప్పినప్పటికీ ఈ ఘటన జరిగిందని పేర్కొన్నారు. రాహుల్ గాంధీతో పాటు ఈ ఘటనలో పాల్గొన్నట్లు ఆరోపణలు ఎదుర్కొంటున్న వారిపై తక్షణమే ఎఫ్‌ఐఆర్ నమోదు చేయాలని, బాధితురాలికి పరిహారం అందించాలని కోరారు. ఈ ఆరోపణలపై కోర్టు విచారణ అనంతరం నిర్ణయం తీసుకోవాల్సి ఉంది.
Also Read:తెలంగాణ ప్రభుత్వం నిద్రపోతుందా?