NGOలపై కేంద్రం ఉక్కుపాదం!

కేంద్ర హోం మంత్రిత్వ శాఖ విదేశీ నిధుల నియంత్రణ చట్టం (FCRA) నిబంధనలను మరింత కఠినతరం చేస్తూ కొత్త సవరణలను తీసుకొచ్చింది. స్వచ్ఛంద సంస్థలు మరియు ఇతర సంఘాలు విదేశాల నుండి పొందే నిధుల వినియోగంలో పారదర్శకత, జవాబుదారీతనాన్ని పెంచడానికి ఈ చర్యలు తీసుకున్నట్లు ప్రభుత్వం స్పష్టం చేసింది.

ఇకపై విదేశీ నిధుల కోసం దరఖాస్తు చేసుకునే లేదా తమ రిజిస్ట్రేషన్‌ను నవీకరించుకునే ప్రతి ఎన్‌జీఓ తమకు సంబంధించిన అధికారిక సోషల్ మీడియా ఖాతాల (ఫేస్‌బుక్, ఎక్స్, ఇన్‌స్టాగ్రామ్ వంటివి) వివరాలను ప్రభుత్వానికి సమర్పించాల్సి ఉంటుంది. ఎన్‌జీఓలు తాము సేకరించే విదేశీ నిధులను ముందే నిర్ణయించిన పనుల కోసం మరియు నిర్దేశిత రాష్ట్రాలు లేదా కేంద్రపాలిత ప్రాంతాలలో మాత్రమే ఉపయోగించాలి. మతపరమైన విద్య, సంప్రదాయాల పరిరక్షణ వంటి కార్యక్రమాలను నిర్వహించవచ్చని పేర్కొంటూనే, ఎట్టి పరిస్థితుల్లోనూ మత మార్పిడులకు ఈ నిధులను వాడకూడదని కేంద్రం స్పష్టం చేసింది.

విదేశీ నిధులు పొందే ఎన్‌జీఓలు ఎటువంటి రాజకీయ కార్యకలాపాలకు పాల్పడకూడదు. అలాగే, ప్రస్తుత వ్యవహారాలు లేదా వార్తలను ప్రసారం చేయడం లేదా వాటికి సంబంధించిన పుస్తకాలు, ఆర్టికల్స్ ప్రచురించడంపై కూడా పూర్తి నిషేధం విధించారు.

భారత సంతతికి చెందిన వారు (PIOs) కాకుండా ఇతర విదేశీ పౌరులు ఎవరైనా ఈ సంస్థల్లో కీలక హోదాల్లో ఉంటే, అటువంటి సంస్థలకు విదేశీ నిధుల రిజిస్ట్రేషన్ లేదా అనుమతులు నిరాకరించబడతాయి. అయితే, కొన్ని ప్రత్యేక సందర్భాల్లో కేంద్ర ప్రభుత్వం దీనికి మినహాయింపు ఇచ్చే అవకాశం ఉంది.

Also Read:టీఎంసీ సుప్రీమోగా మళ్లీ మమత?

ఎన్‌జీఓలు తమ వార్షిక రిటర్న్స్‌తో పాటు తాము చేసిన పనుల పూర్తి వివరాలతో కూడిన ‘యాక్టివిటీ రిపోర్ట్’ను సమర్పించాలి.విదేశీ విరాళం ఎక్కడి నుండి వచ్చింది (సరిగ్గా మూల దాత ఎవరు) అనే వివరాలను కూడా స్పష్టంగా వెల్లడించాలి.గతంలో రిజిస్టర్ అయిన సంస్థలన్నీ ఒక ఏడాది లోపు తాము ఏయే రాష్ట్రాల్లో, ఏ పనుల కోసం నిధులు వాడుతున్నామో ప్రభుత్వానికి తెలియజేయాలి.ఈ కొత్త నిబంధనల ద్వారా సివిల్ సొసైటీ సంస్థలపై ప్రభుత్వ నిఘా మరింత పెరగనుంది.