మహాత్మా జ్యోతిబా ఫూలే 200వ జయంతి సందర్భంగా ఘన నివాళులు అర్పించారు. మహిళలు మరియు అణగారిన వర్గాల హక్కుల కోసం పోరాడిన మహానుభావుడిగా ఆయనను అభివర్ణించారు.
మోదీ తన సందేశంలో మాట్లాడుతూ, మహాత్మా ఫూలే సమానత్వం, న్యాయం మరియు విద్య అనే విలువలకు తన జీవితాన్ని అంకితం చేశారని తెలిపారు. ముఖ్యంగా మహిళల విద్యాభివృద్ధి కోసం, సమాజంలో వెనుకబడిన వర్గాల పురోగతికి ఆయన చేసిన కృషి అమోఘమని అన్నారు. విద్యను శక్తివంతమైన సాధనంగా మార్చి సమాజంలో మార్పు తీసుకువచ్చిన సంస్కర్తగా ఫూలే గుర్తింపు పొందారని పేర్కొన్నారు.
ఈ సంవత్సరం మహాత్మా ఫూలే 200వ జయంతి వేడుకల ప్రారంభంగా నిలుస్తుందని మోదీ చెప్పారు. ఆయన ఆలోచనలు సమాజ అభివృద్ధికి మార్గదర్శకంగా నిలుస్తాయని, ప్రతి ఒక్కరూ వాటిని అనుసరించాలని సూచించారు. ఈ సందర్భంగా రాష్ట్రపతి ద్రౌపది ముర్ము, లోక్సభ స్పీకర్ ఓం బిర్లా, ప్రతిపక్ష నేత రాహుల్ గాంధీ సహా పలువురు ప్రముఖులు పార్లమెంట్ ప్రాంగణంలోని ప్రేరణ స్థల్ వద్ద మహాత్మా ఫూలేకు పుష్పాంజలి ఘటించారు.
మహాత్మా జ్యోతిరావు ఫూలే 1827 ఏప్రిల్ 11న మహారాష్ట్రలో జన్మించారు. ఆయన భారతదేశంలో సామాజిక సంస్కరణలలో ప్రముఖ పాత్ర పోషించారు. కులవ్యవస్థ నిర్మూలన, మహిళల విద్య ప్రోత్సాహం, అణగారిన వర్గాల అభ్యున్నతి కోసం నిరంతరం కృషి చేశారు. ఆయన స్థాపించిన సత్యశోధక సమాజ్ ద్వారా సమాన హక్కుల కోసం పోరాటం సాగించారు.
ALso Read:బాధితుల ఫోటోలతో పాక్కు ఇరాన్ ప్రతినిధులు
మహాత్మా ఫూలే, ఆయన భార్య సావిత్రిబాయి ఫూలే కలిసి మహిళల విద్యకు పునాది వేసిన వారిగా గుర్తింపు పొందారు. సమాజంలో సమానత్వం నెలకొల్పడంలో వారి కృషి చిరస్థాయిగా నిలిచింది.ఈ సందర్భంగా దేశవ్యాప్తంగా మహాత్మా ఫూలే జయంతి వేడుకలు ఘనంగా నిర్వహించబడుతున్నాయి.