నందమూరి బాలకృష్ణ-క్రిష్ కాంబినేషన్‌లో శరవేగంగా తెరకెక్కుతున్న చిత్రం ఎన్టీఆర్. రెండు పార్టులుగా తెరకెక్కుతున్న ఈ చిత్రం సంక్రాంతికి ప్రేక్షకుల ముందుకురానుంది. జనవరి 9న ఎన్టీఆర్ సినిమా నేపథ్యంలో కథానాయకుడు,జనవరి 24న రాజకీయ నేపథ్యంలో మహానాయకుడు ప్రేక్షకుల ముందుకురానుంది. ఇప్పటివరకు ఎన్టీఆర్ సినిమాలో నటిస్తున్న పాత్రలను రివీల్ చేస్తూ అందరిని ఆకర్షించింది చిత్రయూనిట్. తాజాగా ఎన్టీఆర్ సినీ కెరీర్‌లో బిగ్గెస్ట్ హిట్‌ సినిమాలు అందించిన దాసరి నారయణరావు పాత్రలో దర్శకుడు వివి వినాయక్ నటించనున్నట్లు తెలుస్తోంది.
త‌ర్వాతి షెడ్యూల్‌లో దాసరి పాత్ర పోషిస్తున్న వినాయ‌క్‌పై కీలక స‌న్నివేశాలు చిత్రీక‌రించ‌నుంద‌ట చిత్ర బృందం. ఈ చిత్రంలో గుమ్మడిగా దర్శకుడు దేవి ప్రసాద్ ,కేవీ రెడ్డిగా క్రిష్, విఠలాచార్యగా ఎన్‌ శంకర్‌ కనిపించనున్నారు. యన్.బి.కె.ఫిలింస్ పతాకంపై రూపొందుతున్న ఈ చిత్రాన్ని వారాహి చలన చిత్రం, విబ్రి మీడియా సమర్పిస్తున్నాయి. ఈ సినిమాలో విద్యాబాలన్,రానా,కళ్యాణ్ రామ్,కైకాల,రకుల్,జయప్రద,ఆమని కీలక పాత్రల్లో నటిస్తున్నారు.
ఎన్టీఆర్ రాజకీయాల్లోకి వచ్చాక ప్రత్యేకంగా తయారు చేయించిన చైతన్య రథంతో రాష్ట్రమంతటా పర్యటించారు. ఎన్టీఆర్ ప్రచార రథానికి సారధిగా హరికృష్ణ వ్యవహరించగా మహానాయకుడు సినిమాలో కళ్యాణ్ రామ్ సారథిగా కనిపించనున్నారు.
