ఆర్‌సీబీ ఓడినా.. విరాట్ రికార్డు!

సన్‌రైజర్స్ హైదరాబాద్ (SRH)తో శుక్రవారం జరిగిన ఐపీఎల్ 2026 మ్యాచ్‌లో రాయల్ ఛాలెంజర్స్ బెంగళూరు (RCB) స్టార్ బ్యాటర్ విరాట్ కోహ్లీ వ్యక్తిగతంగా పెద్దగా రాణించలేకపోయినప్పటికీ.. టీ20 క్రికెట్‌లో ఒక అరుదైన ప్రపంచ రికార్డును తన పేరిట లిఖించుకున్నారు. ఈ మ్యాచ్‌లో కోహ్లీ 11 బంతుల్లో 15 పరుగులు మాత్రమే చేసి అవుట్ అయ్యాడు. ఈ మ్యాచ్‌లో 256 పరుగుల భారీ లక్ష్య ఛేదనలో ఆర్‌సీబీ 55 పరుగుల తేడాతో ఓటమి చవిచూసింది.

కోహ్లీ త్వరగానే అవుట్ అయినప్పటికీ, వెంకటేష్ అయ్యర్ (19 బంతుల్లో 44 పరుగులు)తో కలిసి పవర్‌ప్లేలో చెలరేగి ఆడాడు. ఈ క్రమంలోనే ఆర్‌సీబీ కేవలం 3.5 ఓవర్లలోనే 50 పరుగుల మార్కును దాటింది. ఈ భాగస్వామ్యంతో విరాట్ కోహ్లీ సరికొత్త ప్రపంచ రికార్డును నెలకొల్పాడు. టీ20 క్రికెట్ చరిత్రలో అత్యధిక సార్లు యాభై లేదా అంతకంటే ఎక్కువ పరుగుల భాగస్వామ్యాల్లో (50+ Partnerships) పాలుపంచుకున్న ఆటగాడిగా విరాట్ కోహ్లీ ప్రపంచ రికార్డు సృష్టించాడు. ఈ క్రమంలో ఇంగ్లాండ్ ఓపెనర్ అలెక్స్ హేల్స్ (210) రికార్డును కోహ్లీ అధిగమించాడు.

పురుషుల టీ20 క్రికెట్‌లో అత్యధిక 50+ భాగస్వామ్యాల్లో ఉన్న బ్యాటర్లు.. విరాట్ కోహ్లీ: 211 సార్లు,అలెక్స్ హేల్స్: 210 సార్లు,డేవిడ్ వార్నర్: 200 సార్లు,బాబర్ ఆజం: 196 సార్లు,క్రిస్ గేల్: 191 సార్లు ఉన్నారు.

ఈ మ్యాచ్‌లో మొదట బ్యాటింగ్ చేసిన సన్‌రైజర్స్ హైదరాబాద్.. అభిషేక్ శర్మ (56), ఇషాన్ కిషన్ (79), హెన్రిచ్ క్లాసెన్ (51), నితీష్ రెడ్డి (29)ల మెరుపు బ్యాటింగ్‌తో నిర్ణీత 20 ఓవర్లలో 4 వికెట్లకు 255 పరుగుల భారీ స్కోరు సాధించింది.

Also Read:Keralam:సెక్స్ రాకెట్ ముఠా గుట్టు రట్టు