రేవంత్ సర్కార్‌పై రాములమ్మ ఫైర్!

కాంగ్రెస్ పార్టీ సీనియర్ నాయకురాలు, ఎమ్మెల్సీ విజయశాంతి (రాములమ్మ) సొంత ప్రభుత్వంపైనే కాకుండా పోలీస్ శాఖపై తీవ్రస్థాయిలో మండిపడ్డారు. రాష్ట్రంలో మహిళల రక్షణ, శాంతిభద్రతల విషయంలో పోలీసుల వైఖరిని తప్పుబడుతూ ఆమె చేసిన వ్యాఖ్యలు ఇప్పుడు రాజకీయ వర్గాల్లో తీవ్ర కలకలం రేపుతున్నాయి.

ఒక తీవ్రమైన పోక్సో (POCSO) కేసులో నిందితుడిగా ఉన్న రాజ్‌కుమార్ అనే వ్యక్తి బెయిల్‌పై విడుదల కావడం, ఆ తర్వాత జరిగిన ఘోర దారుణానికి పోలీసుల నిర్లక్ష్యమే కారణమంటూ విజయశాంతి తీవ్ర ఆగ్రహం వ్యక్తం చేశారు. పోక్సో కేసు నిందితుడు రాజ్‌కుమార్ దగ్గర పోలీసులు భారీగా లంచం తీసుకుని, అతనికి బెయిల్ వచ్చేలా సహకరించారనే విషయం తెలిసి నేను తీవ్ర షాక్‌కు గురయ్యాను. రక్షించాల్సిన పోలీసులే ఇలా డబ్బుకు ఆశపడి తప్పు చేయడం వల్లే, జైలు నుంచి బయటకు వచ్చిన ఆ నిందితుడు ఏకంగా ఆరుగురి అమాయకుల ప్రాణాలను కడతేర్చాడు. ఈ ఘోరానికి పోలీసుల నిర్లక్ష్యమే ప్రత్యక్ష కారణం అని విజయశాంతి ఆరోపించారు.

మహిళల భద్రతకు తాము ఎంతో ప్రాధాన్యత ఇస్తామని కాంగ్రెస్ పార్టీ చెబుతోందని.. కానీ క్షేత్రస్థాయిలో సొంత ప్రభుత్వ పాలనలోనే ఇలాంటి దుర్ఘటనలు జరగడం అత్యంత బాధాకరమని విజయశాంతి ఆవేదన వ్యక్తం చేశారు. ఇలాంటి ఘటనలు ప్రభుత్వ ప్రతిష్టను మసకబారుస్తాయని ఆమె పరోక్షంగా హెచ్చరించారు. ఈ దారుణమైన ఘటనను ముఖ్యమంత్రి, ప్రభుత్వం అత్యంత సీరియస్‌గా తీసుకోవాలని విజయశాంతి డిమాండ్ చేశారు. లంచాలకు ఆశపడి నిందితుడి విడుదలకు సహకరించిన సదరు పోలీస్ అధికారులపై తక్షణమే విచారణ జరిపి, వారిని కఠినంగా శిక్షించాలని కోరారు. రాష్ట్రంలో మహిళల శాంతిభద్రతలను కాపాడటంలో ఎలాంటి రాజీ పడకూడదని ఆమె స్పష్టం చేశారు.

Also Read:రేవంత్ నిర్లక్ష్యం వల్లే సుప్రీంలో చుక్కెదురు