మెగా బ్రదర్‌ నాగబాబు తనయుడు,మెగాప్రిన్స్‌ వరుణ్ తేజ్ తన కెరీర్ ప్రారంభం నుంచి కథ ప్రాధాన్యత కలిగిన సినిమాలో నటిస్తూ మెగా ఫ్యామిలీ హీరోలలో తనకంటూ ఒక స్టార్‌డమ్‌ సంపాదించుకున్నాడు. ఇటీవల విక్టరీ వెంకటేష్‌తో కలిసి నటించిన మల్టిస్టారర్ ‘F2’తో వరుణ్ తాజాగా సూపర్ హిట్ అందుకున్నాడు. ఈ నేపథ్యంలో వరుణ్ తేజ్ తన తదుపరి సినిమాపై దృష్టి పెట్టాడు. ఈ సినిమాను హరీశ్ శంకర్ దర్శకత్వంలో చేయనున్నాడు. తమిళంలో హిట్ కొట్టిన ‘జిగర్తాండ’కి ఇది రీమేక్. తమిళంలో కార్తీక్ సుబ్బరాజ్ దర్శకత్వం వహించిన ఈ సినిమాలో బాబీ సింహా .. సిద్ధార్థ్ ప్రధానమైన పాత్రలను పోషించారు.
తమిళంలో బాబీ సింహా విలన్ షేడ్స్ కలిగిన డాన్ పాత్రలో కనిపిస్తాడు. తెలుగులో ఈ పాత్రను చేయడానికి వరుణ్ తేజ్ అంగీకరించాడు. ఇక సిద్ధార్థ్ పాత్రకు మరో యంగ్ హీరోను ఎంపిక చేయవలసి వుంది. ఈ నెల 27వ తేదీన ఈ సినిమాను లాంచ్ చేయనున్నారు. ప్రస్తుతం అందుకు సంబంధించిన సన్నాహాలు జరుగుతున్నాయి. రామ్ ఆచంట – గోపీనాథ్ ఆచంట నిర్మిస్తోన్న ఈ సినిమాకి, దేవిశ్రీ ప్రసాద్ సంగీతాన్ని అందిస్తున్నాడు.
