ఉత్తరాఖండ్..101 ఏళ్లలో ఇదే అత్యధికం!

ఉత్తరాఖండ్‌లో కురుస్తున్న భారీ వర్షాలతో తీవ్ర నష్టం సంభవించింది. దీంతో భారత వాతావరణ శాఖ (IMD) రాష్ట్రానికి ఎల్లో అలర్ట్ జారీ చేసింది. దెహ్రాదూన్ నగరం 101 ఏళ్లలో అత్యధిక వర్షపాతం నమోదు చేసింది. మంగళవారం ఉదయం 8.30 గంటల వరకు 264 మిల్లీమీటర్ల వర్షం కురిసింది. మాల్దేవత ప్రాంతం 149 మి.మీ. వర్షాన్ని నమోదు చేసింది, ఇది రెండవ అత్యధికం.

వర్షాలతో రాష్ట్రవ్యాప్తంగా 15 మంది ప్రాణాలు కోల్పోయారు. వారిలో 13 మంది డెహ్రాదూన్‌లో, ఒక్కొక్కరు నైనితాల్, ఉధమ్‌సింగ్ నగర్ జిల్లాల్లో మరణించారు. ఇంకా 16 మంది అదృశ్యమయ్యారు. నదులు ఉప్పొంగడంతో 900 మందికి పైగా చిక్కుకుపోయారు. రోడ్లు, వంతెనలు కొట్టుకుపోవడంతో రవాణా వ్యవస్థ పూర్తిగా దెబ్బతింది.

డెహ్రాదూన్‌లోని టపోవన్, సహస్రధారా, ఐటీ పార్క్ ప్రాంతాల్లో ఇళ్లు, దుకాణాలు దెబ్బతిన్నాయి. దెహ్రాదూన్–మసూరీ మార్గం సహా అనేక రహదారులు విరిగిపోగా, వంతెనలు వరద నీటిలో కొట్టుకుపోయాయి. సోషల్ మీడియాలో వెలువడిన వీడియోల్లో SDRF, NDRF బృందాలు తాళ్లతో, పడవలతో ప్రజలను రక్షిస్తున్న దృశ్యాలు కనిపిస్తున్నాయి.

సెప్టెంబర్ 18,19 తేదీల్లో భారీ వర్షాలు కురుస్తాయని వాతావరణ శాఖ తెలిపింది. కొండ ప్రాంతాలు, ఉధమ్‌సింగ్ నగర్‌లో ఉరుములు, మెరుపులతో కూడిన భారీ వర్షాలు కురుస్తాయని వెల్లడించింది. సెప్టెంబర్ 19, 20 తేదీల్లో కుమాయూన్ ప్రాంతానికి ఎల్లో అలర్ట్ జారీ చేశారు. పౌండాలోని దేవభూమి సంస్థలో వరద నీరు చేరడంతో చిక్కుకుపోయిన 400 మంది విద్యార్థులను సురక్షితంగా తరలించారు. పరిస్థితిని స్వయంగా పరిశీలించిన సీఎం పుష్కర్ సింగ్ ధామీ మాట్లాడుతూ – 25–30 ప్రాంతాల్లో రహదారులు పూర్తిగా కొట్టుకుపోయాయి, రవాణా, సంబంధ వ్యవస్థలు దెబ్బతిన్నాయి. రాష్ట్ర ప్రభుత్వం యుద్ధప్రాతిపదికన సహాయక చర్యలు చేపడుతోంది అని భరోసా ఇచ్చారు.

Also Read:TTD:లక్కీ డిప్‌లో అంగప్రదక్షిణ టోకెన్లు