పశ్చిమాసియాలో ముదురుతున్న సంక్షోభం..

పశ్చిమాసియా (మిడిల్ ఈస్ట్) ప్రాంతంలో యుద్ధ మేఘాలు మరింత తీవ్రరూపం దాల్చుతున్నాయి. అమెరికా ఇరాన్ దేశాల మధ్య నెలకొన్న ఉద్రిక్తతలు అంతర్జాతీయంగా కలవరపాటుకు గురిచేస్తున్నాయి. ఇజ్రాయెల్ సైన్యం లెబనాన్‌లోని హిజ్బుల్లా లక్ష్యాలే ధ్యేయంగా వరుస వైమానిక దాడులతో విరుచుకుపడుతోంది. యుద్ధ విరమణ ఒప్పందాల దిశగా ప్రయత్నాలు జరుగుతున్నప్పటికీ క్షేత్రస్థాయిలో మాత్రం మిసైల్ దాడులు బాంబుల మోత మోగుతూనే ఉంది. హిజ్బుల్లా కూడా ఇజ్రాయెల్ సైనిక స్థావరాలపై ఎదురుదాడులు చేస్తుండటంతో సరిహద్దు ప్రాంతాలు రణరంగంగా మారాయి.

అంతర్జాతీయ ఇంధన రవాణాకు అత్యంత కీలకమైన స్ట్రెయిట్ ఆఫ్ హార్ముజ్ (Strait of Hormuz) జలసంధిపై నియంత్రణ సాధించేందుకు ఇరాన్ ప్రయత్నిస్తుండటం అంతర్జాతీయంగా తీవ్ర ఆందోళన కలిగిస్తోంది. ప్రపంచవ్యాప్తంగా సరఫరా అయ్యే ముడి చమురులో ఎక్కువ శాతం ఈ మార్గం గుండానే వెళుతుంది. ఈ జలసంధిని తమ ఆధీనంలోకి తెచ్చుకోవడం ద్వారా భారీగా ఆర్థిక ప్రయోజనాలు సాధించవచ్చని ఇరాన్ సైనిక వర్గాలు భావిస్తున్నాయి. అయితే అంతర్జాతీయ జలమార్గాన్ని ఇరాన్ బ్లాక్‌మెయిల్ అస్త్రంగా వాడుకోవాలని చూడటం ఏమాత్రం అంగీకారయోగ్యం కాదని అమెరికా విదేశాంగ శాఖ తీవ్రంగా ఖండించింది.

అమెరికా నౌకాదళం ఓమన్ గల్ఫ్ పరిసరాల్లో ఇరాన్ ఆయిల్ ట్యాంకర్ల కదలికలపై నిఘా ఉంచింది. ఈ యుద్ధ వాతావరణం కారణంగా ప్రపంచ మార్కెట్లో క్రూడ్ ఆయిల్ (ముడి చమురు) ధరలు అస్థిరంగా మారుతున్నాయి. సరఫరాకు ఆటంకం కలుగుతుందనే భయాల మధ్య చమురు ధరలు ఒక్కసారిగా పెరిగే ప్రమాదం ఉందని ఆర్థిక నిపుణులు హెచ్చరిస్తున్నారు.

Also Read:టెక్నాలజీ యుగంలో జాప్యమా?

మరోవైపు అమెరికా అధ్యక్షుడు డొనాల్డ్ ట్రంప్ ఇరాన్‌తో శాంతి ఒప్పందం కుదుర్చుకునేందుకు ప్రాధాన్యత ఇస్తున్నట్లు ప్రకటించారు. ఇరాన్ అణ్వాయుధాలను సేకరించకుండా అడ్డుకోవడమే తమ మొదటి లక్ష్యమని ఆయన స్పష్టం చేశారు. యుద్ధానికి అవుతున్న భారీ వ్యయాన్ని నియంత్రించడంతో పాటు పశ్చిమాసియాలో శాంతిని నెలకొల్పేందుకు అగ్రరాజ్యం వ్యూహాత్మకంగా అడుగులు వేస్తోంది.ఈ ప్రాంతీయ ఘర్షణల వల్ల సాధారణ ప్రజల జీవితాలు ఛిన్నభిన్నమవుతున్నాయి. లెబనాన్ సరిహద్దుల్లో వేలాదిమంది ప్రజలు సురక్షిత ప్రాంతాలకు వలస వెళుతున్నారు. ఇరాన్ పవిత్ర నగరమైన కోమ్‌లో యుద్ధ భయాలు నిరసనల నడుమ సాధారణ ప్రజలు తీవ్ర ఒత్తిడిని ఎదుర్కొంటున్నారు.