అలహాబాద్ హైకోర్టు ఆదేశాల మేరకు ఉత్తరప్రదేశ్ ప్రభుత్వం కీలక నిర్ణయం తీసుకుంది. వాహనాలపై కులం పేర్లు.. కులాన్ని కీర్తిస్తూ స్లోగన్స్, కోట్స్ ఉంటే జరిమానా విధిస్తామని తెలిపింది.
క్రిమినల్ ట్రాకింగ్ సిస్టంలో నేరస్థుల కులానికి బదులు తండ్రి పేరు పెట్టాలి అని సూచించింది. పోలీస్ స్టేషన్లో నిందితుల పేర్లు చెప్పేటప్పుడు కుల ప్రస్తావన చేయొద్దు అని కీలక ఆదేశాలు జారీ చేసింది.
ఇకపై ఎఫ్ఐఆర్లు, అరెస్ట్ మెమోలు కుల ప్రస్తావన లేకుండా, తల్లిదండ్రుల పేర్లతోనే గుర్తింపు నమోదు చేయబడుతుంది. చట్టపరంగా అవసరమయ్యే సందర్భాల్లో మినహాయింపులు వర్తిస్తాయి. ఉదాహరణకు షెడ్యూల్డ్ కాస్ట్స్ అండ్ షెడ్యూల్డ్ ట్రైబ్స్ (అత్యాచారాల నివారణ) చట్టం కింద దాఖలైన కేసుల్లో కుల గుర్తింపు తప్పనిసరి. ఇందుకోసం స్టాండర్డ్ ఆపరేటింగ్ ప్రొసీజర్స్ (SOPs), పోలీసు మాన్యువల్స్లో సవరణలు చేయాలని ప్రభుత్వం తెలిపింది.
హైకోర్టు తన తాజా తీర్పులో, ఎఫ్ఐఆర్లు, అరెస్ట్ మెమోలు, సీజ్ మెమోలు లేదా పోలీసు నోటీసు బోర్డుల్లో కుల ప్రస్తావన నమోదు చేయడం అనేది దర్యాప్తు కంటే ఎక్కువగా వ్యక్తిగత ప్రొఫైలింగ్ అవుతుందని, ఇది పక్షపాతం పెంచి రాజ్యాంగ విలువలను దెబ్బతీస్తుందని పేర్కొంది.
ముఖ్య సూచనలు:
CCTNSలో కుల ఫీల్డ్ తొలగింపు: క్రైమ్ అండ్ క్రిమినల్ ట్రాకింగ్ నెట్వర్క్ & సిస్టమ్స్ (CCTNS) లోని “కులం” ఎంట్రీని తొలగిస్తారు; దీని కోసం NCRBను రాష్ట్రం సంప్రదిస్తుంది.
తల్లిపేరు నమోదు: పోలీసు ఫార్మాట్లలో తండ్రి లేదా భర్త పేరుతో పాటు తల్లిపేరును కూడా గుర్తింపులో నమోదు చేస్తారు.
ట్రాన్సిషన్ సమయంలో కుల కాలమ్ ఖాళీగా ఉంచడం: సిస్టమ్ మార్పులు పూర్తి అయ్యే వరకు డేటా ఎంట్రీ సిబ్బంది కులం ఫీల్డ్ను తప్పనిసరి కాకుండా ఖాళీగా వదిలేయాలి.
పోలీసు నోటీసు బోర్డుల నుండి కుల ప్రస్తావన తొలగింపు: పోలీస్ స్టేషన్లలో ఉన్న కుల సంబంధిత కాలమ్స్, బోర్డులను తక్షణమే తొలగించాలి.
అరెస్టు, సీజ్ మెమోలలో కుల వివరాలు లేకుండా: అరెస్టు రిపోర్టులు, సీజ్ మెమోలు, పర్సనల్ సెర్చ్ రికార్డుల్లో కుల వివరాలు ఉండకూడదు.
వాహనాలపై కుల గుర్తులు తొలగింపు: వాహనాలపై కులాన్ని సూచించే స్టిక్కర్లు, నినాదాలు, పేర్లు ఉంటే వాటిపై మోటార్ వాహనాల చట్టం ప్రకారం శిక్షా చర్యలు తీసుకుంటారు.
కుల ప్రాశస్త్య బోర్డుల తొలగింపు: పట్టణాలు, కాలనీలు లేదా జిల్లాలను కుల ఆధారిత ప్రాంతాలుగా లేదా “జాగీర్”లుగా సూచించే బోర్డులను తొలగించాలి.
Also Read:BB9:నామినేషన్స్లో ఉంది వీరే!
కుల ఆధారిత రాజకీయ ర్యాలీల నిషేధం: ప్రజా శాంతి భంగం లేదా జాతీయ ఏకత్వానికి విఘాతం కలిగించే కుల ఆధారిత సమావేశాలను నిషేధిస్తారు.
సోషల్ మీడియా పర్యవేక్షణ: కుల ప్రాశస్త్యం లేదా కుల ద్వేషం ప్రోత్సహించే కంటెంట్పై IT నిబంధనలు, 2021 ప్రకారం చర్యలు తీసుకుంటారు.
చట్టపరమైన మినహాయింపులు మాత్రమే: SC/ST చట్టం వంటి ప్రత్యేక సందర్భాల్లో మాత్రమే కుల వివరాలు నమోదు చేయబడతాయి.
ప్రభుత్వం అదనపు ప్రధాన కార్యదర్శి (హోం), డైరెక్టర్ జనరల్ ఆఫ్ పోలీస్ను SOPలు సిద్ధం చేసి, పోలీసు మాన్యువల్స్లో సవరణలు చేయాలని ఆదేశించింది.