ఢిల్లీ మెట్రో విస్తరణకు కేంద్రం నిర్ణయం

ఢిల్లీ మెట్రో విస్తరణకు కేంద్ర మంత్రివర్గం కీలక నిర్ణయం తీసుకుంది. ప్రధాని నరేంద్ర మోదీ అధ్యక్షతన బుధవారం జరిగిన కేంద్ర మంత్రివర్గ సమావేశంలో ఢిల్లీ మెట్రో ఫేజ్–5(ఏ) ప్రాజెక్టుకు అధికారికంగా ఆమోదం లభించింది. ఈ ప్రాజెక్టు ద్వారా రాజధాని ఢిల్లీలో ప్రజా రవాణా వ్యవస్థను మరింత విస్తరించి, ట్రాఫిక్ సమస్యలను తగ్గించడమే లక్ష్యంగా కేంద్ర ప్రభుత్వం ముందడుగు వేసింది.

ఈ ప్రాజెక్టులో భాగంగా మొత్తం 16 కిలోమీటర్ల మేర కొత్త మెట్రో లైన్లను నిర్మించనున్నారు. వీటి వెంట 13 కొత్త మెట్రో స్టేషన్లు ఏర్పాటు చేయనున్నారు. ఈ నిర్మాణ పనులను మూడు సంవత్సరాల వ్యవధిలో పూర్తి చేయాలని కేంద్రం లక్ష్యంగా పెట్టుకుంది. ఫేజ్–5(ఏ) కింద నిర్మించనున్న ఈ 13 స్టేషన్లను మూడు వేర్వేరు కారిడార్లుగా అభివృద్ధి చేయనున్నారు.

ఈ మూడు కారిడార్లలో అతి పొడవైన కారిడార్ ఆర్‌కే ఆశ్రమ్ మార్గ్ నుంచి ఇంద్రప్రస్థ వరకు ఉండనుంది. ఈ మార్గం ద్వారా మధ్య, తూర్పు ఢిల్లీ ప్రాంతాలకు మెట్రో కనెక్టివిటీ మరింత మెరుగవుతుందని అధికారులు భావిస్తున్నారు. కొత్త మెట్రో లైన్లతో ప్రయాణ సమయం తగ్గడమే కాకుండా, కాలుష్యం నియంత్రణకు కూడా దోహదపడుతుందని కేంద్రం పేర్కొంది.

ఢిల్లీ మెట్రో విస్తరణతో రోజువారీ ప్రయాణికులకు సౌకర్యం పెరగనుండగా, నగర ఆర్థిక అభివృద్ధికి కూడా ఇది కీలకంగా మారనుంది.

Also Read:KCR:అహింసా–శాంతి ..క్రీస్తు చూపిన మార్గం