అయోధ్యలోని శ్రీరామ జన్మభూమి ఆలయానికి మరో అరుదైన భక్తి సమర్పణ చేరుకుంది. బాల రాముడిని విశేష ఉత్సవాల సమయంలో అలంకరించేందుకు ప్రత్యేకంగా రూపొందించిన బంగారు పంచలోహ ధనుస్సు అయోధ్య రామ మందిరానికి చేరుకుంది. ఈ ధనుస్సు భక్తుల్లో విశేష భక్తి, ఆధ్యాత్మిక ఉత్సాహాన్ని నింపుతోంది.
సుమారు 286 కిలోల బరువున్న ఈ పంచలోహ ధనుస్సు బంగారం, వెండి, రాగి, ఇనుము, సీసం వంటి లోహాల సమ్మేళనంతో తయారైంది. బాల రాముడికి ఉత్సవాల సందర్భంగా ధరింపజేసే ఉద్దేశంతో దీనిని ప్రత్యేకంగా రూపొందించారు. ఈ అరుదైన స్వర్ణ పంచలోహ ధనుస్సును ఒరిస్సాకు చెందిన భక్తులు రామ మందిరానికి భక్తిశ్రద్ధలతో సమర్పించారు.
ఈ ధనుస్సు తయారీ వెనుక ఎంతో శ్రమ, నైపుణ్యం దాగి ఉంది. తమిళనాడుకు చెందిన 48 మంది మహిళా కళాకారులు దాదాపు ఎనిమిది నెలల పాటు నిరంతరం శ్రమించి ఈ అద్భుత కళాఖండాన్ని రూపొందించారు. సంప్రదాయ శిల్పకళ, లోహకళా నైపుణ్యాన్ని సమన్వయం చేస్తూ వారు ఈ ధనుస్సును అత్యంత సుందరంగా తీర్చిదిద్దారు.
ధనుస్సు తయారీకి సుమారు రూ.1.10 కోట్ల వరకు వ్యయం అయినట్లు అంచనా. ఇది కేవలం ఒక ఆభరణం మాత్రమే కాకుండా, భక్తి, కళ, సంప్రదాయాల సమ్మేళనానికి ప్రతీకగా నిలుస్తోంది. అయోధ్య రామ మందిరానికి చేరుకున్న ఈ బంగారు పంచలోహ ధనుస్సు రాబోయే రోజుల్లో భక్తులను మరింత ఆకట్టుకునే ఆధ్యాత్మిక ఆకర్షణగా మారనుంది.
Also Read:రిటైర్ అయినా వదలం..అధికారులకు హరీష్ హెచ్చరిక