భారతదేశంలో 2014–15 నుంచి 2024–25 వరకు వరి సాగు ఉత్పత్తి డేటా విడుదల కావడంతో, తెలంగాణ రాష్ట్రం దేశవ్యాప్తంగా వరి సాగులో కీలక స్థానాన్ని సంపాదించుకున్నట్టు స్పష్టమైంది. ముఖ్యంగా తక్కువ కాలంలోనే వరి సాగు విస్తీర్ణం, ఉత్పత్తిలో తెలంగాణ అసాధారణమైన వృద్ధిని నమోదు చేసింది. గణాంకాల ప్రకారం తెలంగాణలో వరి సాగు 240 శాతం పెరగడం దేశంలోనే అత్యధికం కావడం విశేషం.
తెలంగాణతో పాటు మధ్యప్రదేశ్లో 80 శాతం, ఉత్తరప్రదేశ్లో 25 శాతం, తమిళనాడులో 20 శాతం, పంజాబ్లో 12 శాతం వరి సాగు పెరిగింది. సాగునీటి వసతుల విస్తరణ, రైతు అనుకూల విధానాలు, ఆధునిక వ్యవసాయ పద్ధతుల అమలు ఈ వృద్ధికి ప్రధాన కారణాలుగా నిపుణులు చెబుతున్నారు. ముఖ్యంగా తెలంగాణలో మిషన్ కాకతీయ, చెరువుల పునరుద్ధరణ, విద్యుత్ సరఫరా వంటి చర్యలు వరి సాగును ప్రోత్సహించాయి.
ఇదే సమయంలో కొన్ని రాష్ట్రాల్లో వరి సాగు గణనీయంగా తగ్గింది. మణిపూర్లో 25 శాతం, ఆంధ్రప్రదేశ్లో 13 శాతం, అస్సాంలో 12 శాతం, కర్ణాటకలో 11 శాతం, ఒడిశాలో 8 శాతం వరి సాగు తగ్గినట్లు డేటా వెల్లడించింది. వాతావరణ మార్పులు, నీటి కొరత, పంటల మార్పిడి వంటి అంశాలు దీనికి కారణాలుగా భావిస్తున్నారు. మొత్తంగా చూస్తే, వరి సాగులో తెలంగాణ దేశానికి దిశానిర్దేశకంగా నిలుస్తోందని తాజా గణాంకాలు స్పష్టం చేస్తున్నాయి.
Also Read:రేవంత్కి గ్రూప్ 1 ఆఫీసర్స్ విజ్ఞప్తి