TGSRTC:ఆర్టీసీలో సమ్మె సైరన్

తెలంగాణ రాష్ట్ర రోడ్డు రవాణా సంస్థ (TGSRTC)లో మరోసారి సమ్మె సైరన్ మోగింది. కార్మిక సంఘాలు తమ డిమాండ్ల సాధన కోసం సమ్మెకు సిద్ధమవుతుండటంతో రాష్ట్రవ్యాప్తంగా రవాణా వ్యవస్థపై ఆందోళన నెలకొంది. తమ సమస్యలపై ప్రభుత్వం మొండివైఖరి ప్రదర్శిస్తోందని ఆరోపిస్తూ ఆర్టీసీ జేఏసీ (JAC) సమ్మెకు వెళ్లేందుకు సిద్ధమైంది.

ఆర్టీసీ జేఏసీ నాయకులు నేడు మధ్యాహ్నం లేబర్ కమిషనర్‌తో చర్చలు జరపనున్నారు. ఈ చర్చల అనంతరం సమ్మె ప్రారంభించే తేదీని అధికారికంగా ప్రకటించే అవకాశం ఉంది. ప్రభుత్వం సానుకూలంగా స్పందించని పక్షంలో, ఈ నెల 20వ తేదీ నుంచి సమ్మెకు దిగాలని కార్మిక సంఘాలు యోచిస్తున్నాయి.గత నెల 13వ తేదీనే ఆర్టీసీ జేఏసీ యాజమాన్యానికి సమ్మె నోటీసు అందజేసింది. చట్టపరమైన గడువు ముగిసినా ప్రభుత్వం నుంచి ఎలాంటి స్పందన రాకపోవడంతో కార్మికులు ఆగ్రహం వ్యక్తం చేస్తున్నారు.

సమ్మె నోటీసు ఇచ్చి నెల రోజులు కావస్తున్నా, ఇప్పటివరకు చర్చలకు పిలవకపోవడం లేదా డిమాండ్లపై స్పష్టత ఇవ్వకపోవడాన్ని జేఏసీ తప్పుబడుతోంది.కార్మికుల డిమాండ్లు: వేతన సవరణ, పెండింగ్ బకాయిల చెల్లింపుతో పాటు ఇతర దీర్ఘకాలిక సమస్యల పరిష్కారం కోసం కార్మికులు పట్టుబడుతున్నారు.

ఒకవేళ ఈ నెల 20 నుంచి సమ్మె ప్రారంభమైతే, రాష్ట్రవ్యాప్తంగా బస్సు సర్వీసులు నిలిచిపోయే ప్రమాదం ఉంది. ఇప్పటికే వేసవి కాలం ప్రారంభం కావడం, శుభకార్యాల సీజన్ కావడంతో ఆర్టీసీ సమ్మె సామాన్య ప్రజలపై తీవ్ర ప్రభావం చూపే అవకాశం ఉంది.

Also Read:వరుణ్ తేజ్..’కొరియన్ కనకరాజు’!

ఇవాళ మధ్యాహ్నం లేబర్ కమిషనర్‌తో జేఏసీ చర్చలు జరపనుంది. ప్రభుత్వం స్పందించకుంటే ఏప్రిల్ 20 నుంచి విధులకు దూరంగా ఉండే అవకాశం ఉంది.