మధ్యప్రదేశ్లోని ప్రసిద్ధ ఖజురాహో ఆలయ సముదాయం లో భాగమైన జవరి ఆలయంలో 7 అడుగుల ఎత్తైన తలలేని శ్రీమహావిష్ణు విగ్రహాన్ని పునరుద్ధరించాలని కోరుతూ దాఖలైన పిటిషన్ను సుప్రీంకోర్టు తిరస్కరించింది. CJI BR గవాయి మరియు జస్టిస్ ఆగస్టిన్ జార్జ్ మసీహ్ లతో కూడిన ధర్మాసనం, ఈ వ్యవహారం న్యాయస్థాన పరిధిలోకి రాదని, అది ఆర్కియాలజికల్ సర్వే ఆఫ్ ఇండియా (ASI) పరిధిలోకే వస్తుందని స్పష్టం చేసింది.
మీరు విష్ణుమూర్తికి గాఢభక్తులు అంటున్నారు కాబట్టి, ఆయనే ఏదో చేయమని అడగండి. ఇది పురావస్తు ప్రదేశం. ఏదైనా పునరుద్ధరణ చేయాలంటే ASI అనుమతి తప్పనిసరి అని న్యాయమూర్తి గవాయి వ్యాఖ్యానించినట్లు తెలుస్తోంది. ఈ పిటిషన్ను రాకేష్ దలాల్ దాఖలు చేశారు. ముఘల్ దాడుల సమయంలో విగ్రహం ధ్వంసం అయ్యిందని, స్వాతంత్ర్యం వచ్చిన 77 ఏళ్లైనా పునరుద్ధరణ జరగకపోవడం భక్తుల మౌలిక హక్కుల ఉల్లంఘన అని ఆయన వాదించారు.
అలాగే, చంద్రవంశ రాజులు నిర్మించిన ఖజురాహో ఆలయాల చారిత్రక ప్రాధాన్యతను గుర్తు చేస్తూ, వలస పాలకులు, స్వాతంత్ర్యం తర్వాతి ప్రభుత్వాలు రెండూ విగ్రహ పునరుద్ధరణలో విఫలమయ్యాయని దలాల్ ఆరోపించారు. ఆయన వివిధ మెమోరాండాలు, నిరసనలు, ఉద్యమాలను కూడా కోర్టు దృష్టికి తీసుకువచ్చారు.
అయితే, సుప్రీంకోర్టు ఖజురాహో ఒక రక్షిత పురావస్తు స్థలం అని మరోసారి స్పష్టం చేసింది. విగ్రహ పునరుద్ధరణకు సంబంధించిన ఏ నిర్ణయం ASIదే అవుతుందని, కోర్టు జోక్యం చేసుకోలేదని ధర్మాసనం స్పష్టంచేసింది. సీనియర్ న్యాయవాది సంజయ్ ఎం. నూలీ వాదనలు విన్న అనంతరం పిటిషన్ను తిరస్కరించింది.
Also Read:TTD:లక్కీ డిప్లో అంగప్రదక్షిణ టోకెన్లు