క్రికెట్.. అమీర్ ఖాన్.. తెల్లవాళ్లు.. అనగానే ఏం గుర్తోస్తుంది మీకు.. లాగాన్ సినిమా. 2001లో విడుదలై బాక్సాఫీస్‌ రికార్డుల్ని షేక్ చేసింది. అమీర్ ఖాన్ హీరోగా అశుతోష్ గోవారికర్ రూపొందించిన ఈ సినిమా అద్భుతమైన విజయం సాధించింది. ఈ సినిమా నేపథ్యం క్రికెట్ కావడంతోను, తాజాగా న్యూజిలాండ్ తో జరిగిన టెస్టు సిరీస్ ను టీమిండియా క్లీన్ స్వీప్ చేయడంతోను సోషల్ మీడియాలో అశ్విన్ ‘లగాన్ వీడియో’ ఒకటి హల్ చల్ చేస్తోంది. ఆ వీడియో ఆమిర్‌ నటించిన లగాన్ సినిమాకి సంబంధించినది. సినిమా చివర్లో ఆమిర్‌ బృందం క్రికెట్ ఆడే సందర్భానికి సంబంధినది ఈ వీడియో.
భారత్‌… న్యూజిలాండ్‌పై టెస్టు సిరీస్‌ను క్లీన్ స్వీప్ చేసి టెస్టుల్లో అగ్రస్థానం సంపాదించింది టీమిండియా. టీమిండియా స్పిన్‌ బౌలర్ రవిచంద్రన్‌ అశ్విన్ ‘మ్యాన్‌ ఆఫ్‌ ద సిరీస్’ కూడా అందుకున్నాడు. ఈ క్రమంలో ఇటీవల అశ్విన్ తన ఫేస్‌బుక్‌లో ఓ వీడియో పోస్టు చేశాడు. అశ్విన్ పోస్టు చేసిన వీడియోలో భువన్‌ (ఆమిర్‌) స్థానంలో విరాట్‌ కోహ్లి, కచ్రా (ఆదిత్యా లాఖియా) స్థానంలో రవిచంద్రన్‌ అశ్విన్ కనిపిస్తారు. వీరితో పాటు హర్భజన్‌ సింగ్‌ సాహాతో పాటు పలువురు భారత్‌, న్యూజిలాండ్ ఆటగాళ్లు ఉన్నారు. వీరందరూ కలిసి క్రికెట్ ఆడుతున్న ఈ వీడియోని చూసిన అశ్విన్ ‘ఎక్కడ నవ్వడం ఆపాలో తెలియడం లేదంటూ’ వీడియోతో కలిపి ఓ పోస్టు చేశాడు. అంతేకాదు బీసీసీఐ మాజీ అధ్యక్షుడు శ్రీనివాసన్‌ కూడా ఈ వీడియోలో ఉన్నారు. అమీర్ లగాన్ సినిమాలో బ్రిటీష్‌ వారికి పన్ను కట్టకుండా ఉండేందుకు గ్రామస్థులు ఇంగ్లీషు దొరలతో క్రికెట్ ఆట ద్వారా ఓ పందెం వేసుకుంటారు. ఈ పందెంలో గ్రామస్థులు గెలిస్తే ఇంగ్లీషు వారికి పన్ను కట్టాల్సిన అవసరం లేదు.
