డ్రగ్స్ వ్యవహారంతో టాలీవుడ్‌కి లింక్‌ ఉండటంతో తెలుగు సినీ రంగం పరువు మొత్తం గంగలో కలిసింది. ఇండస్ట్రీలోని పలువురు నిర్మాతలు, దర్శకులు, నటీనటులు డ్రగ్స్ తీసుకుంటున్నారన్న వార్తలతో టాలీవుడ్ ఉక్కిరిబిక్కిరి అవుతోంది. డ్రగ్స్ వ్యవహారంలో సినీ పరిశ్రమకు చెందిన 10 మందికి ఎక్సైజ్ శాఖ నోటీసులు జారీ చేసింది.
అయితే టాలీవుడ్‌ని షేక్ చేస్తోన్న డ్రగ్స్ స్కాండల్‌లో రానా దగ్గుబాటి పేరు వినిపించడంపై రానా తండ్రి, ప్రముఖ నిర్మాత డి సురేష్ బాబు స్పందించిన సంగతి తెలిసిందే.
‘రానాకు ఏ డ్రగ్స్ అలవాటు లేదు.. దయచేసి అతడిని ఈ వివాదంలోకి లాగొద్దు’ అని సురేష్ బాబు మీడియాకు విజ్ఞప్తి చేయడం కూడా వైరల్ అయింది. ఇదిలావుంటే, తాజాగా ఈ వివాదంపై స్పందించిన రానా దగ్గుబాటి తనదైన స్టైల్లో వివరణ ఇచ్చారు.
“రోజుకు 20 కిలోమీటర్లు జాగింగ్ చేస్తాను. ఆ తర్వాత ఎంతో శ్రమకోర్చి కఠినమైన వర్కౌట్స్ చేస్తాను. ఇలా ఫిట్‌నెస్ కలిగి వుండటం కోసం కఠినమైన నియమాలతో కూడిన డైట్ తీసుకుంటాను. అదే ఒకవేళ తాను డ్రగ్స్‌కి అలవాటు పడి వుంటే ఇదంతా సాధ్యమయ్యేనా” అని ప్రశ్నించిన రానా ఇటువంటి ఆరోపణలేవీ తనని ఏమీ చేయలేవు అని ధీమా వ్యక్తంచేశారు.
డ్రగ్స్ కేసులోనే కాకుండా తరచుగా తమ కుటుంబాన్ని ఏదో ఓ వివాదంలోకి లాగడం అలవాటైందన్న చందంగా మాట్లాడారు రానా. ‘ మొదట్లో థియేటర్లన్నీ సురేష్ బాబు చేతిలోనే వున్నాయని అనేవారు. సురేష్ బాబు థియేటర్లపై గుత్తాధిపత్యం సాధించి చక్రం తిప్పుతున్నారు’ అని ఆరోపించారు. ఆ తర్వాత మరొకటి. రేపు ఇంకొకటి. ఇలా ఎన్ని ఆరోపణలు చేసినా, ఏ వివాదంలోకి లాగినా.. వాటి గురించి పట్టించుకునే తీరిక కానీ ఆసక్తి కానీ తనకి లేవని అన్నారు రానా.
కెరీర్ మొదట్లో ఇటువంటి ఆరోపణల గురించి చాలా ఆవేదనకి గురయ్యేవాడిని. కానీ ఇప్పుడు వాటిని పట్టించుకోను అని అభిప్రాయపడ్డారు ఈ యంగ్ స్టార్ హీరో. తన జీవితంలో ఆలోచించాల్సిన ఇతర విషయాలెన్నో వుండగా ఇటువంటి వాటి గురించి టెన్షన్ పడుతూ కూర్చునేంత సమయం లేదని స్పష్టంచేశారు.
