బాహుబలి ది కన్ క్లూజన్ సంచలన రికార్డులను తిరగరాస్తోంది. ఈ సినిమా కోసం వెయిట్‌ చేసిన ప్రతి ఒక్కరూ.. బాహుబలి2 రిలీజ్‌ తర్వాత ఫిదా అయిపోయారు. అంతేకాదు బాహుబలి2 సృష్టిస్తోన్న సంచలనాలు, జక్కన్నపై ప్రశంసల వర్షం కురిపిస్తున్నారు. జక్కన్న రాజమౌళి చెక్కిన మాహిష్మతి సామ్రాజ్యాన్ని చూసి అభిమానులు మైమరచిపోతున్నారు.
తెలుగు సినిమా ఖ్యాతిని అంతర్జాతీయ స్ధాయిలో నిలబెట్టిన సినిమాగా కొనియాడుతున్నారు. ఇప్పటికే పలువురు ప్రముఖులు బాహుబలిపై ప్రశంసల వర్షం కురిపిస్తున్న విషయం తెలిసిందే. ఇక మొదటినుండీ..తనదైన స్టయిల్‌లో రాజమౌళిని పొగడ్తలతో ముంచెత్తిన ప్రముఖ దర్శకుడు రామ్‌ గోపాల్‌ వర్మ తాజాగా మరోసారి బాహుబలిపై తన అభిమానాన్ని చాటుకున్నారు.
ఇప్పటివరకు..బాహుబలి సినిమాని, రాజమౌళిని పొగుడుతూ వచ్చిన వర్మ.. ట్విటర్‌ వేదికగా ఈ సారి భళ్లాలదేవుడిని ప్రశంసించారు. ‘రానా దగ్గుబాటి.. తెరపై మీ నటన మహాద్భుతం. ఒకవేళ 20ఏళ్ల ముందు గనుక ‘బాహుబలి 2’ వచ్చుంటే.. హాలీవుడ్‌ సూపర్ స్టార్లు ఆర్నాల్డ్‌ ష్క్వార్జ్‌ నెగ్గర్‌, సిల్వస్టర్‌ స్టాలోన్‌లు మీ ముందు పేలవంగా కన్పించేవారు’ అని వర్మ ట్వీట్ చేశారు. లీడర్‌ సినిమాతో వెండితెరకు పరిచయమైన రానా దగ్గుబాటి.. బాహుబలిలోభళ్లాలదేవుడిగా మెప్పించి విమర్శకుల నుంచి కూడా ప్రశంసలు అందుకుంటున్నారు.
ఇదిలాఉంటే.. ఇప్పటికే రామ్‌గోపాల్‌ వర్మ బాలీవుడ్ స్టార్లపై కూడా తనదైన స్టైల్‌ లో ట్వీట్ చేశారు. బాలీవుడ్ లోని ప్రతి సూపర్ స్టార్, ప్రతి సూపర్ డైరెక్టర్ ‘బాహుబలి 2’ ప్రభంజనంతో వణికిపోతున్నారని ట్వీట్ చేసిన విషయం తెలిసిందే. సినిమా విడుదలకు ముందు కూడా వర్మ ఇలాంటి వ్యాఖ్యలే చేశారు.
అంతేకాకుండా బాహుబలి-2వ భాగం విడుదలైన తరువాత, దేశంలోని చిత్ర నిర్మాతలు, దర్శకులందరూ తామంతా టీవీ సీరియల్ నిర్మాతలము, దర్శకులమేనని భావించాల్సి వస్తుందని కూడా వర్మ ట్వీట్ చేసిన సంగతీ తెలిసిందే.
