భారీ వర్షాలు..ఢిల్లీకి ఎల్లో అలెర్ట్!

శనివారం ఢిల్లీ-ఎన్‌సీఆర్ (Delhi-NCR) పరిసర ప్రాంతాల్లో భారీ వర్షాలు కొనసాగుతాయని భారత వాతావరణ శాఖ (IMD) అంచనా వేసింది. ప్రజలు అప్రమత్తంగా ఉండాలని సూచిస్తూ ‘యెల్లో అలర్ట్’ జారీ చేసింది. అయితే, ఆదివారం నుండి సెప్టెంబర్ 8 వరకు ఈ ప్రాంతంలో పొడి వాతావరణం ఉండే అవకాశం ఉందని తెలిపింది.

జాతీయ రాజధాని ప్రాంతంలో వరుసగా రెండో రోజు భారీ వర్షం కురవడంతో సాధారణ జనజీవనం స్తంభించింది. రోజంతా వర్షాలు కురిసే అవకాశం ఉన్నందున అవసరమైన జాగ్రత్తలు తీసుకోవాలని ఐఎమ్‌డీ సూచించింది. పొరుగున ఉన్న ఉత్తరప్రదేశ్ లోని నోయిడా, ఘాజియాబాద్ మరియు హర్యానాలోని గురుగ్రామ్, ఫరీదాబాద్‌లలో కూడా భారీ వర్షాలు కురుస్తాయని తెలిపింది. ఈ ప్రాంతంలో ఏర్పడిన తీవ్రమైన అల్పపీడనం వల్లే విస్తారంగా వర్షాలు కురుస్తున్నాయని పేర్కొంది. శనివారం రాజస్థాన్, పశ్చిమ మధ్యప్రదేశ్, చండీగఢ్ మరియు పశ్చిమ ఉత్తరప్రదేశ్‌లలో అక్కడక్కడ భారీ నుండి అత్యంత భారీ వర్షాలు కురిసే అవకాశం ఉందని ఐఎమ్‌డీ హెచ్చరించింది.

శుక్రవారం కురిసిన వర్షాలకు రాజధానిలోని కన్నాట్ ప్లేస్, లుటియెన్స్ ఢిల్లీ, ఐటీఓ, సైబర్ సిటీ, శంకర్ చౌక్ మరియు సీత్లా మాతా రోడ్ వంటి ప్రధాన ప్రాంతాల్లో నీరు నిలిచిపోయి తీవ్ర ట్రాఫిక్ సమస్యలు తలెత్తాయి. ఇందిరా గాంధీ అంతర్జాతీయ విమానాశ్రయం (IGI) వద్ద రన్‌వే మరియు పరిసర ప్రాంతాల్లో నీరు చేరడంతో పాటు ప్రతికూల వాతావరణం వల్ల విమానాల రాకపోకలకు అంతరాయం కలిగి పలు విమానాలు ఆలస్యంగా నడిచాయి, కొన్నింటిని వేరే మార్గాలకు మళ్లించారు. మరోవైపు, ఈ వర్షాల కారణంగా ఢిల్లీలో గాలి నాణ్యత మెరుగుపడింది. కేంద్రీయ పొల్యూషన్ కంట్రోల్ బోర్డ్ (CPCB) ప్రకారం శుక్రవారం ఎయిర్ క్వాలిటీ ఇండెక్స్ (AQI) 71గా నమోదై ‘తృప్తికరమైన’ విభాగంలోకి చేరింది.

Also Read:అభిషేక్ బర్త్‌డే..యువీ సర్‌ప్రైజ్