ప్రస్తుతం పీరియాడిక్ సినిమాల ట్రెండ్ నడుస్తోంది. రామ్‌చరణ్ నటించిన బ్లాక్‌బస్టర్ మూవీ ‘రంగస్థలం’ నుంచి ఈ ట్రెండ్ మొదలైంది. 1980 బ్యాక్‌డ్రాప్‌లో ఈ సినిమా తీసి ఘన విజయాన్ని అందుకున్నారు దర్శకుడు సుకుమార్. అంతేకాదు ‘మహానటి’ సినిమా కూడా ఈ కోవాకులోనే తెరకెక్కించారు .ఇక నాని సితార ఎంటర్‌టైన్‌మెంట్స్ బ్యానర్‌లో చేస్తున్న ‘జెర్సీ’ సినిమా కూడా 1980 బ్యాక్‌డ్రాప్‌లో చేస్తున్నదే. ముందు ముందు మరికొన్ని సినిమాలు కూడా ఇదే తరహాలో తెరకెక్కేందుకు సిద్ధమవుతున్నాయి.
అయితే ఇప్పుడు ప్రభాస్‌ కథానాయకుడిగా యువీ క్రియేషన్స్‌ సంస్థ ఓ చిత్రాన్ని తెరకెక్కించబోతోంది. ఈ సినిమా రాధాకృష్ణ దర్శకత్వం వహిస్తారు. ఇది 1970 నేపథ్యంలో సాగే ప్రేమకథని తెలుస్తోంది. కథ ప్రకారం యూరప్‌లోనే ఎక్కువ భాగం తెరకెక్కిస్తారు. కాస్త ఫాంటసీ, థ్రిల్లింగ్‌, యాక్షన్‌ కూడా జోడించారట. ఈ సినిమా కోసం కొత్త తరహా సెట్లు నిర్మించే పనిలో ఉంది చిత్ర బృందం.
కళా దర్శకుడు, ప్రొడక్షన్‌ డిజైనర్‌ రవీందర్‌ అప్పటి కాలమాన పరిస్థితులకు అనుగుణంగా కొన్ని సెట్లు తీర్చిదిద్దే పనిలో ఉన్నారని సమాచారం. ఈ ఏడాది ఆగస్టులో చిత్రీకరణ మొదలవుతుంది. పూజా హెగ్డే కథానాయికగా నటించనుంది. ప్రస్తుతం ప్రభాస్‌ ‘సాహో’ చిత్రీకరణలో బిజీగా ఉన్నాడు. ఈ సినిమాకు బడ్జెట్ వంద కోట్ల వరకు ఉంటుందని సిని వర్గాల సమాచారం.
